Уметноста е креирање нешто од ништо, наоѓање убавина во секојдневното и целосно препуштање на креативниот процес. Децата природно ја сакаат уметноста и умеат да ја препознаат на најнеобичните места, во песок, во шумски лисја и трева, во бои, форми и движења. Овие се неколку причини зошто создавањето уметност е толку неопходно за децата.
Поттикнува креативност
Креативноста е вештина која ни помага да размислуваме надвор од рамката, да го претставиме познатото во дотогаш непознато руво. Во свет кој се соочува со низа предизвици, креативноста во размислувањето дава надеж за можни решенија за проблемите. Децата кои редовно практикуваат или создаваат уметност се покреативни, пооригинални и генерално имаат подобар успех во животот.
Поттикнува развој на фината моторика
Користењето четки, цртањето точки, повлекувањето линии, мешањето бои, сечењето со ножици и контролирањето на тубата лепак, сето тоа позитивно влијае на развојот на фината моторика кај децата, како и нивната координација. Децата кои се редовно опкружени со уметнички активности развиваат подобри моторни вештини.
Цртањето му претходи на пишувањето
Бебињата и малите деца кои рано почнуваат да шараат и цртаат на хартија, порано учат да ги контролираат боичките и нивните движења, а за да научат децата да пишуваат, мора прво да шараат и да цртаат.
Развива вештини за решавање на проблеми
Создавањето уметност често отвора можност за решавање на конкретни технички, но и несвесни емоционални проблеми. Преку уметничката работа децата се среќаваат со различни избори, преиспитувања и учат да донесуваат одлуки. Како што расте нивното искуство со различни материјали и стилови, така тие имаат поголема доверба во создавањето на некои нови комбинации и решенија.
Им помага на децата подобро да се сфатат себеси и светот
Децата секојдневно добиваат големи количини на информации, кои понекогаш е тешко се процесуираат. Уметноста им овозможува да ги искусат сите свои емоции во безбедно опкружување што самите го создаваат и да ги прифатат.
Идеите, боите, материјалите, линиите, сето тоа му помага на детето да го разбере и прифати светот внатре и надвор од него. Уметноста му помага на детето да го изрази своето вистинско јас, што е исклучително важно за развој на здраво и самоуверено дете.
