Полот на детето е веќе одреден во моментот кога ќе забремените, иако во првите недели од развојот на момчето или девојчето се одвива сосема исто. Имено, расте испакнувањето од кое подоцна се развива пенисот или клиторисот.
Постојат многу различни теории за тоа „како да се препознае дали бремената жена ќе има момче или девојче“, но едно нешто што лекарите сигурно го знаат е дека во вториот и третиот триместар, жените бремени со девојчиња покажуваат повисоки нивоа на хормонот познат како мајчински серум HCG (MSHCG), хуман хорионски гонадотропин – хормонот одговорен за втората линија на домашниот тест за бременост, отколку жените бремени со момчиња.
Новите истражувања сега сугерираат дека таквите хормонални разлики се појавуваат помалку од три недели по зачнувањето, наведува Human Reproduction.
Јувал Јарон од Институтот за генетика во медицинскиот центар „Сураски“ во Тел Авив и неговите колеги следеле 347 бремености постигнати преку ин витро оплодување. Истражувачите ги тестирале нивоата на HCG хормонот помеѓу 14. и 20. ден по оплодувањето и откриле некои разлики уште на 16-тиот ден.
По три недели, жените кои носеле девојчиња покажале нивоа на хормонот за 18,5 отсто повисоки од оние кои носеле момчиња, без оглед на факторите како што се претходна бременост или возраста на мајката.
Понатаму, мачнината (hyperemesis gravidarum) е нешто почеста кај бременостите во кои жената е бремена со девојче, што може да биде причина за веќе споменатото повисоко ниво на HCG хормонот.
За време на бременоста, постојат многу други хормони кои влијаат на трудниците, без разлика на полот на фетусот. Многумина веруваат дека кога жените се бремени со девојче, нивото на естроген е повисоко, но оваа информација не е поддржана од повеќето студии. Всушност, нивото на естроген во текот на бременоста постојано се зголемува, без разлика на полот на плодот, иако женските фетуси покажуваат поголема концентрација на естроген во плодовата вода на почетокот на вториот триместар.
Тестостеронот во крвотокот на мајката следи слична шема, полека се зголемува за време на бременоста и не дава строги индикации за полот на детето.
Меѓутоа, разлики биле забележани во нивоата на естроген во крвта на мајката. Во една скандинавска студија, нивото на естроген во првата половина од бременоста била околу 9% повисоко кај трудниците со женско дете, а нивото на прогестерон било пониско во вториот триместар.
