Доколку не сте ‘рчеле пред бременоста, веројатно ќе помислите дека нешто не е во ред. Не грижете се, ‘рчењето е честа појава и дури 25% од трудниците повремено ‘рчат. Оваа состојба се јавува поради стеснување на горните дишни патишта под влијание на засилената конгестија и задебелување на слузницата.
Според д-р Роџер Хармс, уредник на Водичот за здрава бременост според Мајо клиниката, иако ‘рчењето е безопасна појава, понекогаш може да биде причина за поголеми проблеми.
Тоа, објаснува тој, може да биде поврзано со покачениот крвен притисок, а жените кои ‘рчат за време на бременоста имаат зголемен ризик од развој на прееклампсија или раѓање на дете со ниска родилна тежина. Според едно истражување, жените кои ‘рчат за време на бременоста имаат двојно поголем ризик од развој на покачен крвен притисок и три и пол пати поголем ризик од забавен раст на плодот, во споредба со жените кои не ‘рчеле додека биле трудни.
‘Рчењето може да биде знак за апнеа во сон. Апнеата е краткотраен престанок на дишењето кој се јавува во сон. Престанокот на дишењето доведува до намалување на кислородот во крвта и обично ја буди мајката од сон и може да биде стресно за детето.
Жените со прекумерна телесна тежина имаат зголемен ризик од проблеми поврзани со ‘рчењето. Во едно истражување жените кои редовно ‘рчеле за време на бременоста, имале зголемена телесна маса пред бременоста, а за време на бременоста добиле плус килограми, во споредба со трудниците кои не ‘рчеле.
СОВЕТИ
- Не спијте на грб, туку на страна. Спиењето на грб може да предизвика придвижување на јазикот и мекото непце кон ждрелото и блокада на минувањето на воздухот.
- Регулирајте ја телесната тежина. Обидете да се да избегнете прекумерно зголемување на килограмите.
Кога да побарате лекарска помош?
Доколку ‘рчењето е гласно и сами се будите од звукот. Исто така, побарајте помош и ако сонот ви се прекинува поради недостаток на воздух, односно поради појава на апнеа. Трудниците кои имаат апнеа во сон, вообичаено во текот на денот се заморени, иако доволно спиеле.
