Според податоците на СЗО за една недела регистирани се 9,5 милиони нови случаи на инфекции со КОВИД-19, што е пораст од 71 отсто во однос на претходната недела.
Реалната бројка на новозаразени веројатно е многу поголема, поради помалиот број на тестирања во бројни региони, како и нецелосните извештаи од некои земји, изјави генералниот директор на СЗО, Тедрос Аданом Гебрејсус.
Бројот на случаи е двојно зголемен во Северна и Јужна Америка, а во Европа е зголемен за 65 проценти.
Бројките се однесуваат за периодот од 27 декември до 2 јануари, кога во светот, 41.000 лица починаа од КОВИД-19.
Од почетокот на пандемијата регистрирани се 5,4 милиони смртни случаи и 289 милиони случаи на инфекции.
Експертката на СЗО, Д-р Марија Ван Керхов изјави дека поединци се уште можат да влијаат на текот на пандемијата.
Таа апелираше на луѓето да одржуваат растојание, правилно да носат маски, да ги проветруваат просториите и да избегнуваат места со гужви, а ги советуваше и училиштата, фабриките и владините агенции да инвестираат во добри вентилациски системи.
“Не се откажувајте, заедно ќе излеземе од оваа пандемија“, изјави таа.
СЗО повторно ја критикуваше нерамномерната распределба на вакцините, истакнувајќи дека уште 90 земји немаат доволно дози за да ги вакцинираат своите 40 отсто од населението.
Нееднаквоста во пристапот до вакцините “е убиец на луѓето и економијата и го поткопува глобалното економско закрепнување“, изјави првиот човек на СЗО, Гебрејсус, додавајќи дека ниските стапки на вакцинација се глобална опасност, што го докажува појавата на повеќе заразни соеви.
