Да се одгледуваат две или повеќе деца понекогаш е вистински предизвик, а секој ден бара целосна посветеност и трпеливост од страна на родителите. Доволен е само еден момент на невнимание за да настане конфликт. Ривалството меѓу браќа и сестри – кое често вклучува натпревар, љубомора и расправии – е природен дел од растењето и присутно е во речиси секое семејство. Може да варира од невини задевања до сериозни караници и длабоки чувства на љубомора.
Експертите издвојуваат пет начини како родителите може да се справат со овие ситуации, без да заземат страна или дополнително да ја влошат ситуацијата.
- Воспитувајте деца што решаваат проблеми, а не што обвинуваат
Судирите се неизбежен дел од секој однос, но важно е како се решаваат. Помогнете им на децата да научат:
- да ги изразуваат своите чувства,
- да го сослушаат другото дете,
- и конструктивно да ги решаваат несогласувањата.
Родителите не треба секогаш да бидат медијатори – децата треба да развијат свои вештини за решавање на конфликти, без постојано да се обвинуваат меѓусебно.
- Не ги споредувајте децата
Реченици како: „Погледни колку е таа паметна, зошто ти не можеш да бидеш таков/таква?“ може да бидат кажани ненамерно, но тие ретко носат нешто добро. Наместо мотивација, можат да предизвикаат љубомора и притисок за споредување со брат или сестра.
Секое дете е уникатно – со свои интереси, потреби и карактер. Одвојувајте квалитетно време со секое дете индивидуално, за да се чувствува ценето како личност, а не како дел од натпревар. Тоа ја намалува љубомората и чувството на занемареност.
- Разговарајте насамо
Обвинување на едно дете пред другото не помага. Напротив, тоа само ја продолжува “играта на вина” и создава срам.
Дури и ако ви е јасно кој е „виновен“, избегнувајте да судите јавно. Наместо тоа:
- разговарајте со секое дете одделно,
- сослушајте ја нивната страна,
- и потоа одлучете како да постапите, со емпатија и насока, не со осуда.
- Воведете неделен семеен состанок
Иако можеби звучи премногу формално, ова може да биде многу корисна навика. Обидете се еднаш неделно да ги соберете сите членови на семејството и да разговарате за работите што ве мачеле.
- Дајте им можност на сите да кажат што мислат.
- Научете ги децата како да ги искажат своите проблеми и аргументи.
- Установете јасни правила на комуникација и поставете ги на видно место како потсетник.
- Помогнете им да ја разберат перспективата на другите
Родителите треба да поттикнуваат емпатија кај децата. Поставувајте прашања како:
- „Како мислиш дека се чувствуваше твојата сестра кога тоа се случи?“
- „Што мислиш дека би направил твојот брат ако ти беше во неволја?“
Ова не само што ја гради емоционалната интелигенција, туку им дава можност и да размислат за своето однесување кога ќе се смират.
