♦♦♦♦♦♦♦
Центарот за контрола и превенција на болести на САД (CDC) беше водечка институција која во изминатите децении ги бранеше американските граѓани од заразните патогени – во 2009 година беше задолжена за епидемијата на вирусот H1N1, додека во 2014 г. го предводеше решавањето на кризата со ебола. Но, во екот на најголемата пандемија во изминатите 100 години, агенцијата неочекувано е отсутна во последните неколку недели, во време кога САД стана светски епицентар на коронавирусот по вкупниот број на заразени.
Според моја проценка, ќе треба да продолжиме да ја одржуваме социјалната дистанца и во текот на мај, јуни и јули за да го ограничиме локалниот пренос на вирусот и со тоа да избегнеме нов бран на зараза, кој ни се заканува кон крајот на есента или почетокот на зимата
Д-р Роберт Редфилд, директор на CDC, го дава својот коментар и видување на развојот на ситуацијата со коронавирусот во форма на радиоинтервју во кое вели дека неговите колеги во изминатите месеци научиле многу за новиот вирус SARS Cov-2, а еден од најбитните заклучоци е неговото пренесување.
„Коронавирусот се шири дури три пати побрзо од обичниот сезонски грип“, истакнува докторот, додавајќи дека асимптоматските носители на вируси се еден од најважните фактори во оваа пандемија, а за нив во овој момент се знае најмалку.
Според последните проценки, дури 25 проценти од граѓаните би можеле да припаѓаат на оваа категорија без притоа да бидат свесни дека се носители на вирусот.
- Според д-р Редфилд, заштитните маски може да се гледаат од две различни перспективи. Како нешто што нè штити од потенцијално заразни други луѓе, но и како нешто што ги штити другите од нас како потенцијално заразни. Но, тој предупредува дека сè уште нема доволно научни податоци за конечниот ефект на маските.
Највредното оружје во борбата против пандемијата на која, како што тврди, сè уште не и се гледа крајот, останува социјалното дистанцирање.
„Според моја проценка, ќе треба да продолжиме да ја одржуваме социјалната дистанца и во текот на мај, јуни и јули за да го ограничиме локалниот пренос на вирусот и со тоа да избегнеме нов бран на зараза, кој ни се заканува кон крајот на есента или почетокот на зимата“, вели д-р Редфилд.
Тој истакнува дека во овој момент следењето на препораките е најважната задача.
„Вирусот не може така едноставно да „скока“ од личност до личност. За трансмисија е потребна блискост, па ако навремено се дистанцираме едни од други, неговата моќ ќе исчезне со текот на времето“.
„Ковид-19 ќе остане со нас некое време“, додава првиот човек на CDC, кој на крајот вели дека сепак, постои светло на крајот од тунелот и за неколку месеци ќе излеземе од оваа пандемија како победници.
Извор: National Public Radio (NPR)
