Кога Рејчел и Филип Риџвеј го започнале своето прво ИВФ патување, тие се консултирале со стручњаци од Националниот центар за донација на ембриони. Од петте ембриони што биле замрзнати за нив, три биле способни за живот.
Рејчел и Филип Риџвеј, кои веќе се родители на уште четири деца, на возраст од осум, шест, три и две години, изјавија за Си-Ен-Ен дека немаат планови за тоа колку деца сакаат да имаат.
“Никогаш не го планиравме бројот на деца што сакаме да ги имаме“, вели Филип. “Секогаш мислевме дека ќе имаме онолку колку што Бог сака да ни даде, но… кога слушнавме за одмрзнување и трансфер на ембриони, сфативме дека сакаме да го направиме тоа“.
Ембрионите биле замрзнати на 22 април 1992 година, а речиси 30 години подоцна, на 28 февруари, Рејчел Риџвеј се одлучила за пренос на сите три ембриони. Таа вели: “Штотуку ми ги покажавте моите три деца. Ги сакам сите“.
Студиите објаснуваат дека замрзнатите ембриони имаат околу 80% шанси за преживување по одмрзнувањето, но само 25%-40% од замрзнатите ембриони успешно продолжуваат да се развиваат и на крајот се раѓаат живи.
Во случајот на Рејчел Риџвеј, од трите пренесени ембриони, два преживеале и го продолжиле својот развој во матката. Близнаците се родени на 31 октомври 2022 година, девојчето Лидија е родено со 2.570 г, а момчето Тимоти имал 2.920 г.
“Неверојатно е“, додава таткото Филип, “што тие се нашите најстари деца, иако се всушност нашите најмали деца“.
Д-р Џим Тонер, експерт за плодност од Атланта, смета дека на спермата или јајце клетката или ембрионот чувани во течен азот, времето не остава траги. Едноставно се “разбудува“ 30 години подоцна,а никогаш “не ни знаело“ дека спие.
Претходниот рекорд за замрзнати ембриони кои резултирале со живо раѓање го држеше Моли Гибсон, која е родена 27 години по замрзнувањето на нејзиниот ембрион.
