Родителите поради своите деца проживуваат стрес шест пати на ден, покажало неодамнешно истражување спроведено во Велика Британија. Најголем стрес е праќањето на децата на спиење, неделната набавка на храна со децата и заедничкиот ручек. Родителите нагласиле дека високо ниво на стрес им претставува и постојаната грижа за тоа да детето напише домашна и научи се за на училиште, како и капењето пред спиење.
Високо на листата на работи што им предизвикуваат стрес е и фактот дека често брзаат дома од работа за да бидат со своите деца, осмислување на менито за јадење и грижата околу правилната исхрана. Родителите кои учествувале во истражувањето изјавиле дека сметаат дека децата на петгодишна возраст најмногу бараат.
„Одговорно да ја работиш својата работа и истовремено да се грижиш за децата понекогаш изгледа неизводливо, па така и наједноставните работи околу децата може да изгледаат невозможни да се направат со мирна глава“, изјавиле родителите. Ги излудува и кога децата тајно јадат слатки пред оброците, цртаат на ѕидовите и теписите или не сакаат да се облечат кога мораат некаде да одат. Како изразен тригер за стрес е и недоличното однесување на децата, од кои родителите го издвојуваат влегувањето во машина за миење садови, криењето во корпата за алишта и кога прават неред во продавница или во ресторан.
Родителите наведуваат дека во споредба со порано, им треба двојно повеќе да излезат од дома, дури 12 минути повеќе отколку пред да имаат деца. За купувањето намирници со деца им требаат 14 минути повеќе, трошат 11 минути повеќе на утринското облекување отколку порано, а заедничкиот појадок им трае 12 минути подолго.
Родителите сметаат дека се дури 40-тина минути дневно сериозно загрижени за своите деца и нивното однесување и дека во просек осум дена во месецот имаат чувство дека им треба малку одмор или време кое би можеле да го поминат само со себе.
