Без разлика дали сте родител кој останува дома, работи од дома или надвор од неа, или сте самохран родител – една работа е заедничка речиси за сите: времето за себе е речиси непостоечко.
Одгледувањето деца бара сè од нас, особено денес, кога менталниот товар на родителството е на историски највисоко ниво. Не е тајна дека многу родители буквално се трудат „само да го изгураат денот“. Фокусирани сме на тоа на нашите деца да им обезбедиме сè што им е потребно за здрав развој и во тој процес често се забораваме себеси. Но, можеби ќе ве изненади фактот дека голем дел од родителите велат дека тоа не им пречи. Напротив, многумина без проблем би жртвувале уште повеќе од своето време – само нивните деца да бидат вклучени во квалитетни и поттикнувачки активности.
Колку време навистина имаат родителите за себе?
Според анкета спроведена од Primrose Schools и Talker Research, во која учествувале 2.000 родители на деца помали од пет години, просечниот родител неделно има само 18 часа „време за себе“. Остатокот од неделата најчесто се троши на работа, домашни обврски и, се разбира, грижа за децата: нивното образование, забава и целокупен развој. И покрај сè, дури 92% од родителите изјавиле дека би биле подготвени да дадат уште повеќе од своето време за да ги поддржат интересите на своите деца.
Речиси сите (96%) активно ги поттикнуваат своите деца да ги истражуваат своите интереси – без разлика дали станува збор за спорт, уметност, музика, готвење или учење. За повеќето родители, секоја минута вложена во развојот на детето, без разлика колку тоа било исцрпувачко, вреди.
Помошта би била добредојдена – но родителите не се откажуваат
Секако, иако тоа време е квалитетно поминато, не значи дека е лесно. Дури 62% од родителите признаваат дека помошта би им била повеќе од добредојдена – и емоционално и практично. Без разлика дали станува збор за запишување во рана едукативна програма, или баба што чита сликовници додека вие во мир пиете кафе – секоја помош значи многу. Сепак, и покрај недостигот на лично време, повеќето родители велат дека никогаш не би ја замениле посветеноста на развојот на своето дете за нешто друго.
Зошто родителите (сепак) прифаќаат дека немаат време за себе?
Родителството менува сè – и животните приоритети, и начинот на кој го гледаме времето. Денес, кога децата може да го поминат најголемиот дел од слободното време пред екрани, многу родители чувствуваат дополнителна одговорност да ги насочат кон активности што ги развиваат и им носат радост. Да, тешко е кога немате време за себе, но уште потешко е да гледате како вашето дете пасивно го минува времето. Кога ќе покажат интерес за нешто корисно, повеќето родители се подготвени да направат сè за да ги поддржат – дури и по цена на сопственото слободно време.
И затоа, иако можеби едвај успеваме да прочитаме една страница од книга или да испиеме кафе додека сè уште е топло, сето тоа добива смисла кога ќе видиме дека нашите деца се среќни, љубопитни и растат.
