Родителството е едно од најпредизвикувачките, но и најубавите животни искуства. Иако не постои совршен рецепт или универзално решение, одредени модели на однесување природно им помагаат на родителите да бидат успешни во својата улога. Психолозите и експертите нагласуваат дека едноставните, секојдневни навики можат да имаат силно и долготрајно влијание врз децата – обезбедувајќи им сигурност, топлина и пример за остатокот од животот.
Уживаат во игра и забава
Децата учат преку игра, а и возрасните во себе носат капацитет за игра – што е важен дел од доброто родителство. Истражувањата покажуваат дека заедничката забава и нежното шегување го подобруваат расположението, ја поттикнуваат креативноста и создаваат чувство на благосостојба.
Се грижат за себе
Родителите можат да дадат на другите само онолку колку што им даваат на себе. Често чувствуваат вина кога ќе издвојат време за сопствените потреби, а понекогаш тоа го засилуваат и осудите од околината: „Каков татко е тој? Каква мајка е таа? Колку себично!“ Но кога родителите редовно се грижат за своето ментално и физичко здравје – преку медитација, вежбање, дружење или мали ритуали – тие стануваат вистински пример за своите деца. Истражување од 2020 година покажа дека децата чии родители практикуваат грижа за себе учат дека тоа е клучно за здрав и избалансиран живот.
Учaт од своите грешки
Родителите често прават грешки – но токму тие грешки можат да бидат најдоброто училиште. Кога родителот ќе признае и поправи грешка, односот со детето може да стане уште посилен. Важно е децата да видат дека родителите учат од своите грешки и се трудат да ги исправат – тоа искуство е исцелувачко и остава длабока порака за иднината.
Ги признаваат тешките делови
Родителството бара жртва, а понекогаш се јавуваат и непријатни чувства кон децата – и тоа е сосема нормално. Прифаќајќи ги тие моменти, родителите можат да ги обработат на здрав начин, наместо да ги потиснуваат. Според истражување од 2023 година, поголемото ниво на самосочувство е поврзано со помал срам и вина, понизок стрес и почеста употреба на позитивни родителски практики.
