Кога сте бремена, веројатно успивањето на бебето го замислувате како неверојатно чувство. Замислувате како нежно го нишате вашето бебе додека во позадина тивко свират приспивни песни. Во реалноста, овој процес е токму спротивното. Затоа, не е изненадувачки што некои родители, во потрага по решение, размислуваат да го испробаат методот на исплачување на детето.
Станува збор за прилично контроверзен метод кој предизвикува бројни дебати. Ова всушност има смисла бидејќи е сосема неверојатно дури и да помислите да го ставите детето во креветче и да го оставите да плаче додека не заспие. Тоа може да потрае со часови, но неговиот автор смета дека е корисно.
Што е методот на исплачување (англ. cry it out)?
Методот е осмислен во 1980 година од страна на д-р Марк Вајсблут, автор на книгата Здрави навики за спиење, среќно дете, кој тврди дека всушност со него се учи доенчето како да се само да се смири и да се ослободи од негативните навики за успивање, како што е држењето во раце. Како што објаснува, идејата е родителите да го остават бебето во креветчето и да го остават да плаче, освен ако не е гладно, жедно или му треба промена на пелена.
Овој метод се разликува од Фербер методот. Станува збор исто така за метод на исплачување (CIO). Разликата е во тоа што Вајсблут ги охрабрува родителите да не интервенираат, додека Фербер советува временски одредени проверки на детето. Секоја вечер, потребно е да се продолжува периодот помеѓу кој го проверувате детето, додека на крајот нема да морате да го правите тоа воопшто.
Според Вајсблут, времето да почнете со тренинзите е на возраст од шест месеци со задолжителна претходна консултација со педијатар. Тој вели дека е потребно што порано да го ставите детето во креветчето и да поминете неколку минути со него. Потоа следи потешкиот дел, односно излегувањето од собата. Родителите не би смееле да влегуваат во собата каде што е детето, дури и ако детето плаче. Според овој доктор, бебето на крајот ќе научи да заспива самостојно.
Вајсблут напоменува дека клучот за успехот е доследноста и држењето до правилата. Во тој случај, би требало да се покаже ефекасно веќе по четири дена.
Овој метод не е за секое дете, ниту за секој родител. Ако мислите дека ќе го проверувате вашето дете на секои неколку минути, без разлика колку сте ненаспани, тогаш подобро е да пробате некои други методи на успивање.
