Сексуалната љубопитност кај децата нема исто значење како мастурбацијата кај постарите деца и возрасните, бидејќи се одвива на несвесно ниво, претставува извор на несвесно задоволство и не е проследена со еротска фантазија со цел, како кај возрасните.
Момчињата порано ги откриваат своите полови органи отколку девојчињата, но одредени истражувања покажале дека девојчињата почесто ги стимулираат своите гениталии во однос на момчињата.
Кога родителите ќе забележат ваква појава кај своите деца, најчесто реагираат со срам, бес, збунетост, а особено со збунетост. Главно избегнуваат разговор со околината на таа тема, а склони се и да ги казнуваат децата, да им се закануваат и да ги задеваат. Ваквите реакции на родителите кај децата предизвикуваат срам, засраменост или чувство на вина, потенцира д-р Маријана Петровиќ, специјалист за медицинска психологија која работи со деца, адолесценти и семејства.
КАКО ДА ПОСТАПИТЕ ВО ВАКВИ СИТУАЦИИ?
Обидете се да не реагирате бурно, обвинувачки, луто или загрижено. Имајте на ум дека љубопитноста за сопственото тело е дел од нормалниот и природен развој, како и дека детската мастурбација нема сексуална конотација. Најчестите прашања што ги поставуваат родителите се дали моето дете ќе се развие во нормална личност, дали ќе биде опседнато со секс или дали ќе биде промискуитетна возрасна личност.
Разгледајте ги околностите под кои тоа се случува – можно е тоа да е ритуал пред спиење (како цицање палец) кој го смирува детето и му олеснува да заспие, па истата активност се повторува секогаш кога детето е вознемирено или напнато. Или обратно, може да се случи детето да си ги истражува гениталиите кога е опуштено, на пример додека гледа телевизија. Родителите треба да сеза грижат само ако допирањето на гениталиите е толку често што детето се исклучува од други активности, ако се повлекува и станува опседнато со истата постапка.
Најчести причини за стимулирање на гениталиите кај децата, освен рефлексното предизвикување на задоволство, се и доживувањето на анксиозност, напнатост, загриженост или осаменост. Во период на турбуленции во семејството (промена на средината, развод, кавги, презафатеност на родителите, раѓање на уште едно дете) забележано е дека оваа појава е почеста. Често и самите родители, доколку прекумерно гсе занимаваат со гениталиите на своите деца при капење и одржување на интимната хигиена, можат да ја поттикнат оваа појава.
Пред сè, размислете дали вашето дете се чувствува осамено или вознемирено, како и дали имало некакви промени во животот на детето. Размислете колку активно внимание му посветувате на детето, на дневна основа, односно колку квалитетено сте ангажирани со детето.
Корисно е да се пренасочи вниманието на детето на нешто што му претставува задоволство во надворешниот свет, надвор од сопственото тело. Воведете некои нови активности и емоционален поттик во кои вашето дете ќе ужива, без да бара утеха во самостимулацијата, нагласува д-р Петровиќ.
Доколку ваквото однесување се продолжи или почне да го забавува развојот и го загрозува здравјето на детето, потребно е да се обратите кај педијатар и детски психолог за да пронајдете индивидуален модел на надминување на проблемот.
