Сексуалната љубопитност кај децата нема исто значење како мастурбацијата кај постарите деца и кај возрасните, бидејќи се одвива на несвесно ниво, претставува извор на несвесно задоволство и не е придружена со еротска фантазија со цел како кај возрасните, објаснува Маријана Петровиќ, психолог.
Момчињата ги откриваат своите полови органи порано од девојчињата, но одредени истражувања покажале дека девојчињата почесто ги стимулираат своите гениталии во однос на момчињата.
“Кога родителите, роднините или луѓето кои се грижат за децата ќе ја забележат оваа појава кај своите малечки, тие обично реагираат со срам, гнев, збунетост, а особено збунетост. Тие главно избегнуваат разговор со околината на оваа тема, а склони се децата да ги казнуваат, да им се закануваат или да ги задеваат. Ваквите реакции на родителите кај децата предизвикуваат срам, непријатност или чувство на вина“, објаснува Петровиќ.
Како да се постапи во вакви ситуации?
Потрудете се да не реагирате бурно, обвинувачки, луто или загрижено. Имајте на ум дека љубопитноста за сопственото тело е дел од нормалниот и природен развој и дека детската мастурбација нема сексуална конотација. Најчестите прашања на родителите се „дали моето дете ќе се развие во нормална личност, дали ќе биде опседнато со секс или ќе биде промискуитетна возрасна личност?
Разгледајте ги околностите под кои тоа се случува – можно е да се работи за ритуал пред спиење (како цицање палец) кој го смирува детето и му олеснува да заспие, па истата активност се повторува секогаш кога детето е вознемирено или напнато. Или спротивно, може да се случи детето да си ги истражува своите полови органи кога е опуштено, на пример додека гледа телевизија. Родителите треба да се загрижат единствено доколку допирањето на гениталиите е толку често што детето се исклучува од други активности, доколку се повлекува и станува опседнато со истата постапка.
“Најчести причини за стимулирање на гениталиите кај децата, освен рефлексивното предизвикување задоволство, е и доживувањето на анксиозност, напнатост, грижа или осаменост. Во период на семејни турбуленции (промена на средината, развод, кавги, зафатеност на родителите, раѓање на второ дете) забележано е дека оваа појава е почеста“, посочува психологот.
За оваа појава можат да придонесат и засилено“еротизираните“ родители, кои нагласено се упатени еден на друг без да ја кријат сопствената сексуалност. Неретко и самите родители, доколку претерано се занимаваат со гениталиите на своите деца при капење и одржување на интимна хигиена, можат да ја поттикнат оваа појава.
Најпрво, разгледајте дали вашето дете се чувствува осамено или вознемирено, како и дали имало некакви промени во животот на детето. Размислете колку активно внимание му посветувате на вашето дете на дневна основа, односно колку квалитетно се занимавате со детето.
Корисно е да се пренасочи вниманието на детето кон нешто што му причинува задоволство во надворешниот свет, надвор од сопственото тело. Воведете некои нови активности и емоционални стимули во кои вашето дете ќе ужива, без да бара утеха во самостимулацијата.
“Доколку ваквото однесување продолжи или почне да го забавува развојот и да го загрозува здравјето на детето, потребно е да се обратите кај педијатар и детски психолог за да најдете индивидуален модел за надминување на проблемот“, вели Петровиќ.
