Психолозите ја опишуваат сепарациската анксиозност како страв од одвојување што најчесто се јавува кај децата кои се особено чувствителни на одвојување од за нив важни луѓе, главно родителите. Најчесто се јавува кога децата почнуваат да одат во градинка, односно кога треба долго време да бидат без родителите, додека дотогаш речиси секогаш биле со нив, но првите знаци може да се појават многу порано. Според „Life Hack“, постојат неколку симптоми кои укажуваат на тоа дека детето поминува низ сепарациска анксиозност.
Детето плаче секогаш кога ќе излезете од собата
Постојат моменти во животот на детето кога пресвртниците поврзани со годините може да предизвикаат анксиозност од разделување. На пример, бебе од четири до осум месеци може да почне да покажува знаци на вознемиреност кога не може да види родител во собата. Детето најчесто почнува да плаче или да покажува знаци на вознемиреност кога ќе остане само, а тоа е затоа што само учи да препознава предмети и луѓе и да создава чувства поврзани со нив. Имено, детето се уште не разбира дека тоа што не може да ги види мама или тато не значи дека ги нема, објаснуваат психолозите. Како што растат децата, сфаќаат дека нивниот родител секогаш ќе се враќа, и како што се воспоставува нивната доверба, тие учат дека местата и луѓето на кои им веруваат нивните родители се исто така безбедни и за нив.
Непознатите работи, места или луѓе се еден од најчестите фактори кои предизвикуваат вознемиреност, а начинот на борба против тоа е да го подготвите вашето дете за промени колку што можете повеќе. Пред да одите на некое место кое мислите дека може да го вознемири вашето малечко, разговарајте со него за тоа и кажете му што да очекува таму
Се вознемирува секогаш кога ќе види нови места или непознати луѓе
Понекогаш детето ќе биде вознемирено кога ќе дојде време да посети нови места или да запознае непознати луѓе. Во овој случај, може да се двоумите да излезете од дома поради некој настан за да ја избегнете вознемиреноста на детето, но не треба да се грижите бидејќи, објаснуваат психолозите, ова е честа појава кај децата кои минуваат низ сепарациска анксиозност. Непознатите работи, места или луѓе се еден од најчестите фактори кои предизвикуваат вознемиреност, а начинот на борба против тоа е да го подготвите вашето дете за промени колку што можете повеќе.
Пред да одите на некое место кое мислите дека може да го вознемири вашето малечко, разговарајте со него за тоа и кажете му што да очекува таму. На тој начин многу полесно ќе се справите со чувството на непријатност, а исто така и ќе помине многу побрзо.
Имате проблем да го заспиете
Вашето дете веќе некое време без проблем спие во сопственото креветче, но во последните ноќи единствено се смирува кога ве гушка и кога вие лежите до него? Ова е еден од најчестите показатели за сепарациската анксиозност, и како што брзо доаѓа, исто толку брзо и ќе исчезне. Психолозите објаснуваат дека родителите често се загрижени, но без причина, бидејќи ваквото однесување на детето е многу честа појава на одредена возраст. Најчесто се јавува кога детето поминува низ некои значајни промени, на пример тргнување во градинка или добивање помало братче или сестричка.
