Шокантно истражување покажало дека многу 10-годишни деца губат од осум до девет часа сон неделно, што е еднакво на една цела ноќ, бидејќи не можат да се оттргнат од социјалните мрежи. Истражувањето го спровел д-р Џон Шо од Универзитетот Де Монтфорт, а ја испитувал улогата на користењето на социјалните мрежи и квалитетот на спиењето кај предтинејџерската возраст.
Истражувањето покажало дека децата на возраст од 10 години кои користат социјални мрежи пред спиење спијат помалку и дека постои поголем ризик од анксиозност кај нив.
Истражувањето исто така покажало дека децата на возраст меѓу 10 и 11 години спијат во просек само 8,7 часа навечер. Иако ова можеби не звучи лошо за возрасните, количината на сон што лекарите ја препорачуваат за оваа возрасна група е 9-12 часа сон во текот на ноќта, што значи дека децата губат еквивалент на цел ноќен сон секоја недела.
Околу 70 отсто од испитаниците кои учествувале во истражувањето поминувале околу 4 часа дневно на социјалните мрежи, а половина од тоа време непосредно пред спиење.
Но, како да ги одвикнете вашите мали зависници од тоа? Ема Пјетрас споделува неколку совети. . .
- Практикувајте го она што го проповедате
Децата ги копираат своите родители, па ако сте залепени за вашиот мобилен телефон 24 часа на ден, лицемерно е да им викате на децата да се тргнат од нивните.
Обидете се со семеен дигитален детокс, дури и ако е само неколку часа, за време на кој можете да играте друштвени игри и да ги исклучите тоновите на вашите мобилни телефони и да ги ставите надвор од дофат на рака (на пр. во кутија, фиока или друга просторија).
- Префрлете го телефонот на црно-бел
Социјалните мрежи се дизајнирани да им овозможат на корисниците бранови на еуфорија. Но, бескрајното вртење низ тие платформи одеднаш станува помалку привлечно кога сè е црно-бело. А тоа е лесно да се направи на телефонот на вашето дете – одете во поставки и префрлете се на сиви тонови.
- Ограничување на времето поминато пред екран
Одлучете колку време пред екран ќе му дозволите на вашето малечко, а потоа поставете дигитален тајмер каде што секој ќе може да гледа. Кога ќе истече времето, телефонот се исклучува. Можеби тоа не им се допаѓа, но вие сте родител и вие ги поставувате правилата. Дури и ако врескаат дека сте најлошиот родител, бидете доследни за да знаат дека нема друга опција.
- Само една социјална мрежа
Многу деца се на повеќе платформи за социјални медиуми, па нека изберат само една. Променете ја лозинката за мрежата што сте ја одбрале и не ја споделувајте со никого, а избришете ги останатите. Потоа оневозможете ја можноста на нивниот телефон да презема апликации без ваша согласност. После тоа, треба да ги проверите следбениците што детето ги има на социјалната мрежа и заедно со него да ја поминете листата и да ги оставите само луѓето кои ви се блиски.
- Користете кутија за оставање на мобилните телефони
Одредете време во доцните попладневни часови кога вашето дете треба да го предаде телефонот, барем неколку часа пред спиење, за да се опушти. Земете кутија за чевли и во неа ставете ги мобилните телефони, секако, а пред тоа исклучете ги тоновите за ѕвонење и на известувања, за да не го искушуваат детето. Кажете дека смее да ја допира кутијата до следниот ден.
- Ангажирајте ги
Досадата често е причина за безумно гледање во мобилниот телефон, затоа обидете се со нешто да ги ангажирате вашите деца навечер. Нека ви помогнат во кујната со правење чај. Или ако се доволно возрасни, предизвикајте ги сами да направат едноставен оброк. Тоа е ситуација во која сите добиваат.
