Тука нема љубов, ниту сексуална желба. Тоа е сексуален напад и насилство над лице кое не сака блискост. Силувањето е кривично дело, злосторство со кое друга личност се присилува на сексуален чин, без оглед на тоа дали го прави туѓинец или блиска личност на жртвата.
Лицето кое е силувано, има потреба од медицинска помош, утеха, разбирање и поддршка. Што ако жртва на сексуално насилство е вашето дете?
- КАКО ДА ПРЕПОЗНАЕТЕ ДЕКА ДЕТЕТО БИЛО СИЛУВАНО?
Ако вашето дете е сексуално нападнато, постои можност тоа не ви го каже. Во тие тинејџерски години, децата обично имаат поголема доверба во другарите, отколку во родителите, што за жал, е случај и со силувањето.
Дури и ако вашето дете нема доверба во вас, некои знаци може да укажат на тоа дека тоа се бори со поголем проблем и дека му е потребна помош:
- Пречесто го менува расположението и е нервозно
- Луто е, преплашено и збунето
- Се чувствува депресивно, анксиозно, нервозно, особено кога е само
- Се одвојува од семејството и пријателите
- Има проблеми со спиењето
- Му се менува апетитот
- Не може да се концентрира во училиште и за време на секојдневните активности
Сите овие може да бидат знаци на посттрауматско стресно нарушување, кое често се јавува кај силуваните лица. Доколку забележите некои од овие знаци, обидете се да разговарате со детето и да му укажете на тоа дека, што и да е во прашање, ќе го ислушате и поддржите.
Ако детето и натаму не сака да ви се отвори, а вие се сомневате дека нешто се случува, најдобро е да се обратите кај психотерапевт за помош.
- СЛЕДЕН ЧЕКОР – ПОБАРАЈТЕ СТРУЧНА ПОМОШ
Ако вашето дете е жртва на силување, многу е важно веднаш да реагирате.
Акутно силување е она кое се случило вопретходните 72 часа (три дена). Веднаш повикајте полиција и лекар. Во болница, детето ќе биде прегледано, за да се утврди дали постојат повреди и сексуално преносливи болести. Има установи со обучени професионалци кои се грижат за силувани лица и знаат како да им пристапат.
Доколку е можно, детето треба да остане во истата облека и неискапено, иако во природата на човекот е веднаш од себе да ги измие трагите на тешкиот инцидент. Сепак, преглед во истиот момент ќе помогне во собирањето докази, но ќе овозможи и навремена медицинска помош на жртвата.
Неакутно силување е она кое се случило пред повеќе од 72 часа. Во секој случај, задолжително повикајте полиција, а потоа и лекар поради медицинска проценка на детето.
- ШТО СЕ СЛУЧУВА НА ПРЕГЛЕДОТ?
Пред самото тестирање, лекарите, сестрите, консултантите, социјалните работници ќе го сослушаат детето. Разговорот ќе го насочи медицинскиот третман и ќе помогне во истрагата.
Разговор со лице кое знае како да се постави, многу ќе му помогне на детето на емотивен план, ќе го смири и ќе му влее доза на сигурност која сега му недостасува.
- Веројатно ќе биде тестирано на полово преносливи болести
- Ако е во прашање девојче, ќе се провери дали е дојдено до бременост
- Ќе биде испитано дали детето има било какви поврдеи
- Професионалци ќе ја прегледаат кожата, ноктите, облеката за да пронајдат траги
- Ако постои можност детето и да е под дејство на наркотици, лекарите ќе го проверат и тоа.
- ЕМОТИВНОТО ЗДРАВЈЕ Е ОД ИСКЛУЧИТЕЛНА ВАЖНОСТ
Најважна работа на која мора да се фокусирате е емотивното здравје. Лицата кои се силувани често се плашат да побараат помош и да разговараат за тоа. Присетувањето и отворањето на таа приказна во главата е многу болно и тешко. Некогаш повторното преживување на тие сцени може и да ја влоши состојбата. Токму затоа, многу е важно детето, покрај вашата целосна поддршка и љубов, како и безбедност, покрај себе да има стручно лице со кое ќе разговара за се што се случило. Стручното лице ќе знае на кој начин да му пристапи на проблемот, да му се отвори детето, а тоа да не предизвика контраефект и уште поголема болка.
