Болеста на рацете, стапалата и устата е вирусна инфекција, која најчесто ги зафаќа децата, особено оние од градинка и се карактеризира со појава на осип на кожата на рацете, стапалата и во устата. Симптомите обично вклучуваат треска, болки во грлото, и рани или афти во устата.
Осипот се појавува како ситни црвени точки или плускавци на дланките, стапалата, прстите на рацете и нозете. Во устата, осипот се манифестира со болни ранички или чиреви, најчесто лоцирани во задниот дел на грлото. Освен осипот, децата често имаат покачена телесна температура во првите неколку дена од болеста. Некои деца имаат и дијареја. Иако осипите на кожата се блага непријатност, раничките во устата можат да бидат толку болни што децата одбиваат да јадат или пијат, пишуваат од Детската болница во Филаделфија.
Не постои специфичен лек за оваа болест
Не постои специфичен лек за оваа болест. Најинтензивната болка во устата обично поминува во рок од три до пет дена, но можете да ги олесните симптомите и да направите на вашето дете да му биде поудобно со следење на овие совети:
- Олеснете ја болката во устата со лекови како парацетамол или ибупрофен за да може детето да пие и да избегне дехидрација.
- Понудете помека храна, како јогурт, тестенини, пудинг или смути.
- Внимавајте на внесот на течности, но запомнете дека водата сама по себе не ја обезбедува потребната енергија доколку детето не јаде.
Важно е да се избегнува контакт со други луѓе додека симптомите не исчезнат, бидејќи болеста е високозаразна
Превенција
Вирусот коксаки, кој ја предизвикува оваа болест, најчесто се шири преку плунката и столицата. Затоа болеста често се јавува кај мали деца кои допираат други или делат играчки, а потоа ги ставаат рацете во уста. Најдобар начин да се спречи ширењето на вирусот е честото миење на рацете. Возрасните исто така може да се разболат, па затоа вие како родители редовно мијте ги рацете, особено додека се грижите за детето или по менување пелени.
Како и кај повеќето детски вируси, тешко е прецизно да се одреди кога децата повеќе не се заразни. Децата може да го шират вирусот еден ден пред да се појави осипот и неколку дена по појавата на осипот.
Во некои случаи, симптомите на болеста на рацете, стапалата и устата може да бидат многу слични со други вирусни инфекции. Ако симптомите не се подобруваат или се појават нови симптоми, треба да се консултирате со педијатар
Кога да се јавите на лекар?
Повеќето деца добро закрепнуваат и можат да останат дома додека не поминат температурата и болките, но нема потреба да се чека да исчезне осипот. Осипот може да биде на телото дури недела или две. На родителите им се препорачува да побараат медицинска помош во следниве ситуации:
- Детето не внесува доволно течности и покажува знаци на дехидрација (намалено мокрење, сува уста, темно жолта урина).
- Температурата трае три или повеќе денови.
- Детето има силни болки.
- Доколку забележите промени во однесувањето на вашето дете.
- Имате други грижи.
