Кога вашето бебе е болно, тоа може да изгледа многу застрашувачки, особено затоа што не може да ви каже што го боли или што го мачи. Како родител, би направиле сè за да му помогнете да се чувствува подобро. Но, важно е да се знае дека секој лек носи ризик од можни несакани ефекти.
Што е хлорамфеникол?
Хлорамфеникол е антибиотик. Тој е изолиран од бактеријата Streptomyces venezuelae и првпат е откриен во 1947 година. Тоа бил првиот антибиотик произведен во големи количини.
Сепак, неколку години подоцна, лекарите и научниците откриле дека хлорамфениколот може да предизвика сериозни несакани ефекти, поради што неговата употреба била ограничена. Денес, хлорамфениколот сè уште се користи за многу третмани, вклучително и за менингитис кај луѓе кои се алергични на пеницилин и за инфекции на очите.
Што е синдром на сиво бебе?
Синдромот на сиво бебе е состојба при која доенче доживува животозагрозувачка реакција на антибиотикот хлорамфеникол. Почесто се јавува кај предвремено родени бебиња, бидејќи појавата е директно поврзана со незрелата способност на црниот дроб да го разгради и исфрли лекот. Сепак, може да се појави и кај деца до две години.
Кај бебињата со овој синдром доаѓа до нагло паѓање на крвниот притисок. Кожата и ноктите можат да добијат сивкаста боја поради недостаток на кислород, а усните често стануваат сини.
Други симптоми на синдромот на сиво бебе вклучуваат:
- раздразливост и немир,
- повраќање или дијареја,
- притисок или надуеност во стомакот,
- губење на апетит.
Ако забележите кој било од овие симптоми кај вашето бебе, веднаш побарајте лекарска помош. Проверете ги сите лекови што ги прима бебето или што ги користите вие самите – хлорамфениколот може да премине во организмот на бебето и преку доењето.
Кога се дава во соодветна доза кај здраво доенче, хлорамфениколот обично не е опасен. Но, зголемена доза може да доведе до натрупување на лекот во организмот на бебето. Дополнително, постоечки здравствени проблеми кај бебето можат да го зголемат ризикот од развој на синдромот.
Дијагностицирање на синдромот на сиво бебе
Најчесто, родителите го информираат лекарот за употребата на хлорамфеникол при земање на медицинската историја и податоците за неодамнешни терапии. Ако причината за симптомите не е јасна, потребни се дополнителни испитувања за да се исклучат други сериозни состојби, како што се:
- неонатална сепса,
- траума предизвикана од злоупотреба,
- волвулус на средното црево,
- вродени срцеви заболувања,
- метаболни нарушувања.
Кај бебињата со овој синдром доаѓа до нагло паѓање на крвниот притисок. Кожата и ноктите можат да добијат сивкаста боја поради недостаток на кислород, а усните често стануваат сини
Лабораториските анализи може да вклучуваат:
- мерење на нивото на шеќер во крвта,
- комплетна крвна слика,
- биохемиски анализи (метаболен панел),
- анализа на крвни гасови,
- серумски амонијак,
- серумска млечна киселина.
Вашиот лекар може исто така да побара рентген на граден кош и абдомен, како и компјутерска томографија (CT), ултразвук и електрокардиограм.
Третман на синдромот на сиво бебе
Навременото препознавање на симптомите значително ги зголемува шансите за закрепнување. Традиционално, се користат:
- хемоперфузија со активен јаглен и
- размена на крв.
Овие постапки помагаат во отстранување на хлорамфениколот од организмот. Паралелно, се даваат други антибиотици за лекување на основната инфекција.
Поради намалениот проток на крв, телесната температура на бебето може да се намали, па може да бидат потребни ќебиња за загревање или ламба за греење. Се дава кислород за да се олесни оксигенацијата, а доколку е неопходно, бебето може да биде и интубирано. Брзата стабилизација на состојбата е клучна за спречување на дополнителни оштетувања.
Превенција на синдромот на сиво бебе
Хлорамфениколот не е лек што се купува без рецепт и секогаш мора да биде пропишан од лекар. Внимателно читајте ги упатствата и предупредувањата пред да му дадете каков било лек на бебе или дете. Доколку имате сомнежи, консултирајте се со педијатар или фармацевт.
Секогаш кога му давате нов лек на вашето дете, внимателно следете дали се појавуваат несакани реакции. При најмало сомнение за симптоми на синдром на сиво бебе, веднаш контактирајте лекар или однесете го детето во најблиската здравствена установа. Иако симптомите може да наликуваат на поблага болест, тие можат да укажуваат и на сериозна состојба, затоа е подобро секогаш да се биде претпазлив. (WebMD)
