Постојат бројни истражувања за родителството, но ретко кое трае со децении и ги следи луѓето низ целиот нивен живот.
Едно од таквите е познатото истражување на Харвард кое следело студенти повеќе од 70 години, како и големата британска студија започната уште во 1946 година. Тогаш истражувачите собрале податоци за повеќе од 14.000 мајки и нивните деца, а подоцна, низ годините, следеле десетици илјади деца за да видат како се развиваат – во образованието, здравјето и животот воопшто.
Прашањето што сите го поставувале било едноставно: што навистина влијае на тоа дали едно дете ќе биде среќно и успешно?
Еден од очекуваните заклучоци бил дека децата кои растат во потешки услови имаат помалку можности.
Како што објаснува авторката Хелен Пирсон, „некои од нас го добиваат она што Ворен Бафет го нарекува ‘лотарија на јајниците’, а некои не“.
Но тука доаѓа важниот дел – тоа не е целата приказна.
„Родителството е важно, можеби и најважно“, нагласува Пирсон. Со други зборови, иако околностите имаат влијание, она што родителите го прават секој ден може да направи огромна разлика.
Да се биде добар родител е поедноставно отколку што мислите
Кога истражувачите споредувале деца од слични услови, забележале дека одредени однесувања на родителите имаат големо влијание.
И добрата вест е – повеќето од тие работи не чинат ништо.
Родителите чии деца подоцна имаат подобри резултати најчесто:
- разговараат и ги слушаат своите деца
- покажуваат очекувања и верба во нив
- се емоционално достапни и топли
- поттикнуваат учење (букви, бројки)
- ги носат децата на прошетки и излети
- им читаат секојдневно
- одржуваат рутина, особено пред спиење
Едноставно, но лесно се заборава
Веројатно си помисли: „Па ова е логично.“ И навистина е. Но токму овие основни работи најлесно се губат во брзото секојдневие.
Денес често мислиме дека мора да организираме „квалитетно време“ преку разни активности, планови и излети. Но истражувањата покажуваат нешто друго – на децата најмногу им значи наједноставното.
Тоа се моментите кога навистина ги слушаш.
Понекогаш се доволни само 15 минути
И самата Хелен Пирсон признава дека, покрај работата, често имала многу малку време за разговор со своите деца. Затоа одлучила да воведе мала промена – секоја вечер да одвои 15 минути само за нив.
Разговараат за денот, без брзање и без одвлекување на вниманието.
И токму тие моменти се оние што децата ги паметат.
