Зошто постои таква опсесија со родилната тежина? Општо, родилната тежина може да биде добар показател на здравјето на бебето, вели д-р Давид Хил.
Но, додека родилната тежина е “пристоен“ барометар на здравјето, бројот не е совршено мерило. Помало бебе може да има бистри очи и розеви образи, додека новороденче со нормална родилна тежина може да има повеќе здравствени проблеми. Со оглед на тоа, постојат неколку општи насоки.
ГЕСТАЦИСКА ВОЗРАСТ
Родилната тежина во голема мера зависи од гестациската возраст, односно колку време детето минало во матката. За бебињата кои се родени во термин, просечната тежина е помеѓу 2,7 до 4 килограми. Но, за оние бебиња кои се родени порано или подоцна од терминот, просечната тежина е малку поинаква.
“Во повеќето случаи, ако бебето е предвреме родено – ќе биде помало, односно ако е родено по терминот – ќе биде поголемо. Затоа во проценката на родилната тежина, прво се проверува гестациската возраст“, објаснува д-р Хил.
Поради тоа што, предвреме родените бебиња немаат целосен развој во матката, имаат поголем ризик од здравствени компликации како жолтица, потешкотии со дишењето или проблеми со срцето. Но, сепак, потенцира лекарот, само затоа што предвреме роденото бебе е помало од она кое е родено во термин, не значи по автоматизам дека е и помалку здраво.
ГЕНЕТИКА
Дури и бебињата кои се родени во термин или малку подоцна, понекогаш не спаѓаат во категоријата на просечна тежина, од многу причини. Понекогаш е во прашање само генетика, можеби двата родитела се ниски или двајцата се високи и имаат вишок килограми.
Најчесто, помала или поголема просечна родилна тежина на бебето е одраз на мајчиното здравје.
Кога новороденчето тежи помалку од 90% од бебе со иста гестациска возраст, тоа новороденче се смета за “мало во однос на гестациската возраст“. Малата родилна тежина за гестациската возраст најчесто е резултат на тоа дека фетусот не примил полна залиха на нутриенти или кислород кои се потребни за нормален развој на телото и ткивото.
Од друга страна, ако бебето тежи над 90% од бебе од иста гестациска возраст, тоа новороденче се смета за “големо со оглед на гестациската возраст“. Големата родилна тежина за гестациската возраст може да биде предизвикана од дебелина на мајката или прекумерна телесна тежина добиена во бременоста. Најчесто големата родилна тежина е поврзана со гестациски дијабетес.
