Студија на Универзитетот во Њукасл, која вклучила околу илјада парови, помага прилично сигурно да се утврди дали идните родители ќе имаат син или ќерка.
Испитувањето на Кори Џелајтли, истражувач на споменатиот универзитет, покажало дека мажите наследуваат од своите родители тенденција да имаат повеќе синови или ќерки. Тоа значи дека мажот со многу повеќе браќа, веројатно ќе има синови, додека маж со многу сестри веројатно ќе има ќерки.
Студијата опфатила анализа на 927 семејни стебла. Тие содржеле информации за 556.000 лица од Северна Америка и Европа, а податоците достигнуваат до 1600 година.
“Анализата на семејното стебло покажа дека тоа дали веројатно ќе имате момче или девојче – зависи од наследните фактори. Сега знаеме дека мажите имаат повеќе синови ако имаат повеќе браќа, како и дека поголема е веројатноста дека ќе имаат ќерки ако имаат повеќе сестри. Но, кај жените едноставно не може да предвидите“, објаснува проф. Џелајтли.
Мажите го одредуваат полот на бебето во зависност од тоа дали нивната сперма носи X или Y хромозом. X-хромозом на мажот во комбинација со мајчиниот Х-хромозом создава женски плод (ХХ), а Y-хромозом во комбинација со мајчиниот Х-хромозом содава машки плод (XY).
