Необјаснетите случаи на тежок хепатитис, пријавени кај скоро 400 деца ширум светот, би можеле да бидат резултат на низа промени во телото предизвикани од непрепознаена инфекција со коронавирус SARS-CoV-2, велат научниците.
Кај децата заболени од Ковид-19 забележан е значително поголем ризик од дисфункција на црниот дроб по одредено време, покажуваат резултатите од студијата објавена на веб-страницата medRxiv, која сè уште не поминала рецензија.
Кај децата заболени од Ковид-19 забележан е значително поголем ризик од дисфункција на црниот дроб по одредено време, покажуваат резултатите од студијата објавена на веб-страницата medRxiv, која сè уште не поминала рецензија
Забележано е дека родителите на повеќето деца со акутен хепатитис, ретка болест во оваа возрасна група, не пријавиле претходна историја на инфекција со SARS-CoV-2.
Утврдено е дека повеќето од пациентите се заразени со аденовирус наречен 41F, а во медицината не е познато дека овој вирус го напаѓа црниот дроб.
Можно е заболените деца, од кои повеќето не биле вакцинирани поради возраста, да имале благи или асимптоматски инфекции со SARS-CoV-2 кои поминале незабележани, претпоставува друг тим на научници кои ги објавиле своите заклучоци во часописот „The Lancet Gastroenterology & Hepatology“.
Доколку нивната претпоставка е точна, остатоците од коронавирус кои се задржуваат во гастроинтестиналниот тракт на децата би можеле да го поттикнат имунолошкиот систем да реагира претерано на аденовирус 41F, па затоа големата количина на воспалителни протеини на крајот може да го оштети црниот дроб.
„Препорачуваме децата со акутен хепатитис да се тестираат за присуство на SARS-CoV-2 во столицата и да се обрне внимание на други сигнали кои укажуваат на оштетување на црниот дроб, бидејќи шилестиот протеин на коронавирус е „суперантиген“ што го прави имунолошкиот систем претерано осетлив“, велат научниците.
СЗО минатиот вторник потврди дека научниците ја истражуваат можната поврзаност на аденовирусот со Ковид-19.
