Секоја бременост е различна, но искуството од првата има големо влијание врз тоа како ќе се одвива втората. Женското тело памети – и на физиолошко и на хормонално ниво. Затоа многу мајки забележуваат дека втората бременост и породување се покуси, полесни и понекогаш помалку интензивни. Периодот на трудови трае пократко, грчевите по породување се понежни, а целокупниот процес поминува побрзо. Секако, секоја жена и секое тело се уникатни, но постојат некои општи разлики кои ги доживуваат повеќето жени при втората бременост. Во продолжение – што можете да очекувате доколку повторно станувате мајка.
Втората бременост обично трае пократко
Иако се смета дека бременоста трае 40 недели, истражувањата покажуваат дека првата бременост просечно трае 41 недела и 3 дена – дури 10 дена подолго. За разлика од тоа, втората бременост трае околу 40 недели и 3 дена. Причината е што телото веќе има „искуство“ – хормоналните промени почнуваат побрзо, а и организмот полесно се адаптира.
Второто породување е побрзо и пократко
Додека првото породување обично трае околу 18 часа, второто просечно трае 8 часа. Секако, ова варира од жена до жена, но најчесто – второто породување е полесно. Причината е што телото веќе се има подготвено еднаш – лигаментите се веќе растегнати, а карличните мускули полесно се отвораат.
Трудовите доаѓаат побрзо
Мускулите и лигаментите во карлицата и вагината веќе еднаш поминале низ процесот на породување. Затоа, телото побрзо препознава што треба да направи, а и бебето полесно се „спушта“. Трудовите може да започнат ненадејно, и да напредуваат побрзо отколку при првата бременост.
Помалку (или поинакви) грчеви по породување
По породувањето, особено во првите 3 до 5 дена, телото природно се собира и враќа во претходната состојба. Кога бебето ќе почне да цица, се ослободува хормонот окситоцин, кој ја поттикнува матката да се грчи и да се намалува. Овие грчеви може да личат на менструални болки. Многу жени забележуваат дека тие се поблаги по втората бременост – но и ова зависи од организмот.
