Покачената телесна температура релативно често се јавува кај бебињата и децата – повеќе или помалку секој пат кога ќе „соберат“ некој вирус или бактерија. Црвени образи, потење, леплива или жешка кожа на допир, се се тоа знаци кои би можеле да укажуваат на покачена температура кај бебињата и децата, но не секоја покачена температура е и треска.
Што се смета за треска кај бебињата
Кај бебињата температурата повисока од 38 Целзиусови степени официјално се класифицира како треска, објаснува д-р Филипа Каја за madeformums.com. Нормалната температура кај бебиња и деца на возраст под пет години е 36,4 степени Целзиусови, што е малку пониска од нормалната температура за возрасни (37 степени), но таа варира меѓу децата, па дури варира и кај едно дете во текот на денот.
Што е треска кај мали и постарите деца
Дури и за овие малку постари деца и деца на возраст од градинка, температурата повисока од 38 степени се смета за треска.
Инаку, покачената температура и треската често се користат како синоними, но всушност тие го немаат истото значење. Имено, поимот треска се однесува само на температура повисока од 38 Целзиусови степени, додека висока или покачена температура може да биде било која нешто повисока од нормалната, а пониска од 38 степени – на пример, 37,5.
Кога треба да се оди на лекар
Дали веднаш ќе отидете на лекар зависи од тоа колку години има детето, колку е висока температурата, колку време е покачена, дали детето има некои други симптоми…
Доколку бебето е помладо од три месеци, д-р Каја советува да го однесете на лекар ако температурата е 38 степени или повисока, а тоа е уште поважно ако детето е помладо од еден месец.
За бебиња на возраст од три до шест месеци, се препорачува посета на лекар ако температурата е 39 степени или повисока.
Без разлика на тоа колку години има детето, се препорачува посета на лекар доколку треската трае подолго од пет дена.
Освен тоа, ако детето не внесува доволно течности или доволно не мокри, се чувствува поспано, тешко се буди, тогаш ви треба итна медицинска помош.
