Воспалението на средното уво е многу честа појава кај децата и кај бебињата. Отитисот може да настане како последица на неправилно издувување на секретот од носот, настинка или како последица од алергија. Најчесто причината е вирусна (понекогаш и бактериска) инфекција, која се јавила како последица на респираторна инфекција на ноот или ждрелото. Секако, не значи дека секое дете или бебе кое има респираторна инфекција ќе добие воспаление на средното уво а исто така ниту секоја болка во увото значи дека е присутна веќе споменатата дијагноза.
Еве што според лекарите, секој родител треба да знае за воспалението на средно уво:
БОЛКА ВО УВОТО КОЈА НЕ Е ПРЕДИЗВИКАНА ОД ВОСПАЛЕНИЕ НА СРЕДНО УВО:
Кога на бебето/детето му е затнат носот многу брзо може да дојде до запушување на на Евстахиевата туба која го спојува носот со шуплината на средното уво. Тогаш се таложи течност која ја “растегнува“ мембраната што предизвикува болка. Ако на бебето му ставите капки во нос или соодветен спреј и потоа му го извадите секретот од носот во рок од 15-20 минути, болката треба да исчезне. Ако болката остане, тогаш станува збор за воспаление на средно уво. Ако бебето или детето и натаму се жали на болка, време е да се посети педијатар.
СИМПТОМИ НА ВОСПАЛЕНИЕ НА СРЕДНО УВО
Најчести симптоми се болка во увото и зголемена температура, како и слаб апетит, главоболка, нерасположение, понекогаш и пролив. Кај малите бебиња симптомите може да бидат постојан плач, трлање на главата од подлога, доближување на раката до увото, одбивање на храна оти цицањето им предизвикува болка. Понекогаш симтомите како пролив, раздразливост и температура ги наведува родителите да помислат дека се во прашање забите, па затоа најдобро е секоја промена кај бебето да ја провери педијатар.
ЛЕКУВАЊЕ
Терапијата ја одредува стручен лекар, најчесто оториноларинголог, во соработка со педијатар. Од најголема важност е да се одржува проодност на носот.
