Децата понекогаш лажат, едноставно тоа е составен дел од нивното растење и созревање и ќе се обидат да ве излажат барем еднаш, ако ништо друго тогаш од чиста љубопитност да видат дали лагата ќе „помине“.
Не е ништо невообичаено детето да се обидува да ве лаже, но како вие како родител ќе реагирате на тоа е многу важно. Ова е најдобриот начин да реагирате за да го поттикнете вашето дете да ја кажува вистината во иднина.
- Охрабрете го да биде искрено
Важно е да бидете трпеливи и полни со разбирање и да го поттикнете на искреност низ отворен разговор и личен пример, бидејќи така ќе воспоставите доверба меѓу вас, што е клучно за детето да може секогаш да ви ја кажува вистината.
- Останете смирен
Сигурно е дека „полудувате“ кога ќе фатите дете во лага, но важно е да не бидете премногу строги, туку да останете смирени и да го потсетите детето дека е важно да ја каже вистината.
- Откријте го мотивот
Децата лажат од различни причини, вклучувајќи го и стравот дека родителите ќе ги казнат ако ја дознаат вистината или понекогаш можеби сакаат да привлечат внимание. Обидете се да откриете зошто детето ве лаже и веќе сте на половина пат до решението.
- Практикувајте отворена комуникација
Погрижете се да создадете таква атмосфера и однос каде на детето му е доволно пријатно за да ви ја каже вистината. Дајте му до знаење дека ја цените чесноста и дека за грешките може да се разговара без осудување.
- Бидете добар пример
Обидете се да ја направите искреноста ваш водечки принцип во секојдневниот живот. Децата ги имитираат своите родители, па затоа е важно да бидете добар пример за нив.
- Научете ги кои се последиците
Објаснете му на детето дека лажењето може да ја уништи довербата помеѓу вас (или другите вклучени во приказната) и има лоши последици. Дајте му неколку примери кои лесно ќе ги разбере и кои ќе му дадат до знаење дека искреноста е секогаш најдобрата опција.
- Избегнувајте казни
Премногу строги казни може да го заплашат детето и всушност да го обесхрабрат да ви ја каже вистината во иднина. Наместо тоа, држете се до дисциплина која ќе му помогне на детето да учи од грешките на конструктивен начин.
