Појавата на чудно воспаление, кое е многу слично со Кавасаки синдромот изминатиот период ги збунува и лекарите. Како што вели главниот американски епидемиолог Ентони Фаучи “треба да се биде понизен пред новиот коронавирус кој е голема загатка“, а пример за тоа се случаевите со воспалителна болест кај децата.
Но, според детскиот инфектолог д-р Горан Тешовиќ не може да се тврди дека пандемијата со КОВИД-19 дефинитвно е поврзана со зачестеното појавување на Кавасаки болеста.
Станува збор за системска воспалителна болест со непознаста етиологија кога главно ги погаѓа децата, поретко адолесцентите. Опишано се, објаснува тој, само неколку слуачи на Кавасаки болест кај возрасни лица.
“Тоа е болест чија етиологија не ја знаеме и по повеќе од 50 години откако таа за прв пат е опишана во Јапонија. Не ја знаеме вистинската природа на таа болест. Беа предложени разни хипотези, меѓутоа ниту една од нив не е потврдена. Значи, дали таа болест можеби е поттикната од некоја бактериска или некоја вирусна болест… Имаше и неколку различни вируси кои беа доведувани во релација со можно настанување на Кавасаки болеста“, вели д-р Тешовиќ.
Се знае дека е тоа системска, воспалителна болест која ги зафаќа лимфните јазли на слузницата, кожата, срцевиот мускул, црниот дроб. Исто така, не смее да се заборави дека новиот коронавирус е само еден од коронавирусите.
“И претходно меѓу децата кои имале Кавасаки болест било потврдено дека претходно имале инфекција со коронавирус, но со некој друг коронавирус, не со овој кој ја предизвика пандемијата со КОВИД-19“, истакнува д-р Тешовиќ и додава дека не е утврдена меѓусебна поврзаност на КОВИД-19 и Кавасаки болеста.
“Тоа е едно епидемиолошко запазување кое е забележано во неколку европски земји, Британија, Италија, Шоанија, сега и во САД. Но, ние не можеме да тврдиме дека пандемијата со КОВИД-19 дефинитивно е поврзана со зачестено јавување на Кавасаки болеста. Се се сведува на епидемиолошко забележување и ќе видиме како работите ќе се одвиваат во иднина. Некои од овие деца во европските земји кои имале Кавасаки болест немале докажана инфекција со новиот коронавирус. Според тоа, ние не знаеме дали инфекцијата со новиот коронавирус и на кој начин е поврзана со зачестеното појавување на Квасаки болеста во последните неколку месеци“, додава д-р Тешовиќ.
Според него, основен дијагностички критериум кога воопшто може да се посомнева за Кавасаки болеста е висока телесна температура која трае најмалку пет дена. Тука е и оток на лимфните јазли, најчесто на лимфните јазли на вратот, па потоа промени на кожата, осип кој потсетува на бактериската болест шарлах.
Се јавуваат и промени на слузницата, првенствено конјуктивитис. Доаѓа до промена и во слузницата на устата, таа е црвена, како и промени на јазикот кој е изразено црвен, со изразени папули. Постојат секако и други симптоми. Покрај ова во лабораториските наоди треба да се зголемени параметрите за воспаление, се гледа оштетување на црниот дроб, зголемени се и нивоата на ензимите на црниот дроб.
