Прашање кое секоја мајка си го поставила барем еднаш е колку долго треба да дои. Препораката на Светската здравствена организација е детето да се дои до шест месеци, но постојат причини зошто мајките би можеле престанат да дојат порано или веднаш да се префрлат на вештачко млеко.
Сепак, не постои точно одредена граница кога детето треба да престане да се дои. Таа одлука е исклучиво на мајките и нивните бебиња.
„Треба да доите се додека тоа е взаемно корисно за вас и вашето бебе. За некои мајки тоа може да значи воопшто да не дојат. Други пак би можеле да дојат додека нивното дете не наполни две години. Доењето е нешто многу индивидуално и никој не може да одреди кога треба да престанете“, објаснува медицинската сестра и советник за доење Хилари Садлер.
Кои се предностите на доењето?
Иако доењето не е секогаш нужно, тоа со себе носи бројни придобивки, како за детето, така и за мајката. Садлер истакнува дека мајките кои дојат имаат намален ризик од прекумерна загуба на крв по породувањето и намален ризик од развој на рак на дојка, јајчници и ендометриоза.
Некои предности за бебето вклучуваат негов оптимален раст и развој, функционирање на гастроинтестиналниот систем, спречување на болести како што се гастроентеритис, дијареа и респираторни заболувања и намален ризик од синдром на ненадејна смрт на доенчиња.
Сепак, Садлер уште еднаш истакнува дека иако горенаведените информации се засноваат на докази, жената самата знае што е најдобро за неа и нејзиното дете и дека секогаш треба да се потпира на сопствената интуиција.
