Многу родители за секоја зголемена температура, необична столица, осип или пак за гласно плачење, во паника истрчуваат кај својот педијатар или во дежурните служби. Лекарите велат дека во овие, но и сите останати ситуации родителите треба да бидат присебни, и советуваат за тоа кои симптоми кај детето може да се игнорираат, а поради кои сепак е потребно да се побара помош.
БЕБЕТО ПЛАЧЕ СО ЧАСОВИ
Ако тоа се случува прв или втор пат, главно нема причина за паника, но ако бебето е изразено раздразливо, секој ден доцна попладне и навечер, имате причина да се посомневате на колики (грчеви). Но, дури ни тоа не е страшно, како што може да изгледа. Бебињата кои имаат грчеви изгледаат како многу да страдаат, но може да се смират, барем на некое време, со методи како што се лулање, масажа на стомакот во насока на стрелките на часовникот и носење во исправена положба.
Според експертите, кај помалку од пет проценти од децата кои имаат епизоди на неутешно плачење, се евидентираат органски пореметувања, и тоа најчесто уринарна инфекција. Во тој случај, нагласуваат педијатрите, заедно со коликите е присутна и температура, слабо хранење, слабо напредување на телесната маса, и слично.
Иритабилноста кај детето може да биде последица и на случувања поврзани со средишниот нервен систем, што е проследено со отстапки во невролошкиот развој или повраќање. Од акутните пореметувања, извор на ненадеен налет на неутешен плач може да биде инвагинацијата – вовлекување на еден дел од цревото во друг, но и во тој случај се јавува дополнителна симптоматологија – бледило, повраќање, крв во столицата, малаксалост. Освен тоа, ваквата состојба се случува нагло и интензивно, со прогресивно влошување на општата состојба на детето, кое изгледа болно, што кај доенечките колики не е случај.
БЉУЦКАЊЕ И ПОВРАЌАЊЕ
Бљуцкањето обично повеќе ги вознемирува родителите, отколку самото бебе. Освен што дигестивниот систем се уште се развива, причина за засилено бљуцкање може да биде и халапливото цицање, пореди кое бебето, освен млеко голта и одредена количина на воздух.
“Малиот детски желудник не е во состојба да вари, па вишокот воздух заедно со млекото го исфрлаат надвор. Тоа се случува и при нагли промени на положбата на телото непосредно по хранењето. Поради незрелост на сфинктерот кој се наоѓа помеѓу хранопровдот и желудникот, тој не се затвора доволно и храната се враќа од хранопроводот во устата надвор“, објаснуваат педијатрите.
Важно е родителите да ја следат состојбата на детето: ако детето само бљуцка мала количина млеко без напор, а добро напредува, детето е задоволно, не треба да се загрижуваат. Но, ако детето повраќа, особено во млаз поголема количина желудочна содржина, ако во содржината има примеси на крв, ако детето губи на тежина, ако често плаче, побарајте совет од педијатар.
“Таквите состојби се јавуваат при стеснување на желудникот, гастроезофагеален рефлукс, болести на метаболизмот, инфекција и тогаш е потребно понатамошно испитување кај гастроентеролог“, велат експертите.
ЗЕЛЕНА СТОЛИЦА
Бројот и изгледот на бебешката столица често се причина за загрженост кај родителите. Но, според зборовите на американскиот педијатар д-р Кен Халер, густината од мека глина до омлет е во ред, како и бојата од жолта до зелена, или кафеава.
“Зелената столица понекогаш се нарекува и столица на глад, но ако бебето добро напредува, значи дека не е гладно и нема причина за загриженост“, објаснува тој.
“Цврста или ретка столица може повремено да биде присутна кај здраво дете, што исто така не е загрижувачки. Пролив се смета ако детето има три или повече ретки, водлести столици во текот на денот, кои може да бидат и слузави. Ако таквата столица, потрае неколку дена, посетете лекар“, советува д-р Халер.
Што се однесува до навистина загрижувачките бои, белата може да биде знак на дигестивни проблеми, а црвената или црната упатуваат на крв во столицата, а тоа може да биде знак на алергија на некоја намирница. Педијатрите сепак подвлекуваат дека и кај здраво дете може да се случи при напнување да пукне некој капилар и неколку капки крв да се јават на пелената или во столицата, но тоа обично минува и не се повторува. Ако крв се јавува при секоја столица, нужни се дополнителни медицински испитувања.
