Периодот на бременост за секоја жена е време на големи промени и психички и физички. Повеќето бремености напредуваат без никакви проблеми и повеќето трудници и кога мислат дека нешто не е во ред, всушност “дуваат на јогурт“.
Меѓутоа, постојан некои симптоми кои упатуваат на сериозни компликации и кои не смеете да ги игнорирате. Ако чувствувате дека со вашето тело нешто навистина не е во ред, побарајте лекарска помош. Дури и ако на крајот се покаже дека не сте биле во право, ниту еден лекар нема да ви замери што сте го контактирале, а вие ќе бидете мирни.
Ова се симптоми кои може да упатуваат на сериозни компликации:
- Интензивна болка во стомакот
Ако сте бремена помалку од 12 недели и чувствувате оштра болка во долниот дел од стомакот (од едната или од двете страни на матката), може да се работи за вонматерична бременост. Болка во рамената и околу ректумот исто така упатува на вонматерична бременост, па треба итно да се јавите на лекар. Оштрата болка може да упатува и на спонатн абортус, проблеми со постелката или предвремено породување. Болка во горниот дел од стомакот околу црниот дроб, може да биде симптом за прееклампсија – пореметување што се јавува кај 5 до 8 проценти од бремени жени. Најчесто се јавува по 20. недела од бременоста, а симптоми се висок крвен притисок и протеини во урината.
- Болка во градите
Може да упатува на белодробна емболија (крвно згрутчување во белите дробови) или плевритис (воспаление на обвивката на белите дробови) и не смее да се игнорира.
- Треска и температура
Ако имате температура од 37.8 степени, а немате други симптоми, веднаш обратете се кај вашиот лекар. Исто така, ако телесната температура ви е над 38.9 степени, побарајте лекарска помош, оти може да се работи за некаква инфекција која бара лекување со антибиотици.
- Изразени отоци на долниот дел од нозете и претерано дебелеење
Овие симптоми може да упатуваат на прееклампсија.
- Претерано повраќање и/или пролив
Иако утринските мачнини се непријатни, тие не се опасни. Но, постојано повраќате и ако не можете ништо да задржите во себе, може да дехидрирате. Исто така, ако имате пролив, се намалува количината на телесни течности, што може да биде опасно за вас и вашето дете. Ако повраќањето е проследено со висока температура, можеби ќе треба да ве хоспитализираат за да примите инфузија.
- Главоболка, двојна слика или светкање пред очи
Ако имате главоболка во текот на првото тромесечје или редовно страдате од мигрена, веројатно не се работи за ништо сериозно. Но, ако имате изненадни главоболки, двојна слика или ви се јавуваат светки пред очите во второто и во третото тромесечје, тоа би можело да биде сигнал за прееклампсија и опасно висок крвен притисок, а тоа бара болничко лекување.
- Отечени и болни нозе
Болни отечена нога што е топла на допир, може да биде знак за длабока венска тромбоза, па итно повикајте лекар. Но, длабоката венска тромбоза може да се замени со вообичаена и безопасна состојба на површински тромбофлебитис кој ги напаѓа малите вени на површината на кожата на долниот дел од нозете, кои8 во текот на бременоста стануваат црвени и чувствително, особено ако имате прекумерна тежина.
- Вагинално крварење
Во првите 12 недели од бременоста, мала количина на безболно крварење е вообичаена. Но, ако крварите посилно, најдобро е да направите преглед кај гинеколог. Тешко и болно крварење бара моментална лекарска помош.
- Чешање по цело тело
Може да биде симптом на трудничка холестаза (пореметување на функцијата на црниот дроб) кое доведува до зголемена акумулација на жолчни соли во крвотокот. Не постои опасност за мајката, но детето може да биде загрозено.
