Сите сме слушнале за постпородилна депресија, а некои можеби дури и ја искусиле. Постпородилната депресија е вид на депресија која се јавува по породувањето. Жената доживува хормонални, физички, емоционални, па и финансиски и социјални промени по раѓањето на бебето. Овие промени може да предизвикаат симптоми на постпородилна депресија.
Постпородилната депресија може да има благи симптоми кои нема ни да ги регистрирате, туку ќе ги прогласите за резултат на сè што ви се случува и можеби некоја непроспиена ноќ. Благите симптоми не спаѓаат под постпородилна депресија, туку под таканаречениот „бејби блуз“ и ги доживуваат повеќето родилки.
- Промени во расположението
- Анксиозност
- Тага
- Чувство на раздразливост
- Необјасниво плачење
- Чувство на преплавеност од сè
- Намалена концентрација
- Проблеми со апетитот
- Проблеми со спиењето
Симптомите на постпородилна депресија може да бидат и со посилен интензитет и потешко е да се игнорираат. Ова е знак дека не треба да ги чувате за себе, туку дека е време да побарате помош, барем во непосредна близина. Ова се средно силни симптоми:
- Депресивно расположение и сериозни промени во расположението
- Прекумерно плачење
- Проблеми со поврзувањето со бебето
- Повлекување од пријателите и семејството
- Губење на апетит или прејадување
- Несоница или предолго спиење
- Постојан силен замор
- Губење на интерес за активности кои порано ве правеле среќни
- Често чувство на фрустрација и силна лутина
- Чувство на несоодветност или безвредност
- Појава на мисли за самоповредување или повреда на бебето.
- Повторувачки мисли за самоубиство или смрт
Од симптомите можете да видите дека стануваат се потешки и посериозни. Но, тие не се ни врвот на најсилната постпородилна депресија. За среќа, многу ретко се јавува постпородилна психоза. Симптомите се:
- Конфузност и чувство на изгубеност
- Опсесивни мисли за бебето
- Халуцинации и делузии
Запомнете, постпородилната депресија не е знак на слабост и слаб карактер. Доколку се открие и реши навреме, може да придонесе за брзо и висококвалитетно закрепнување и поврзување со бебето.
Како да се борите со постпородилната депресија?
Доколку и самите забележите дека нешто не е во ред или некој околу вас го навестува тоа, не срамете се, не кријте се или не мислете дека ќе помине за неколку дена, додека вашите мисли стануваат се помрачни. Постојат неколку работи што можете да ги направите:
- Побарајте стручна помош и личност со која ќе разговарате
- Разговарајте отворено за вашите чувства со партнерот, други мајки, пријателка…
- Придружете се на некоја од групите за поддршка
- Најдете некој кој ќе ви помогне да се грижите за бебето
- Штом можете и смеете, почнете со лесни прошетки или изберете друга форма на рекреација
- Трудете се да не се грижите за непотребните работи и бидете реални во поставувањето цели
- Елиминирајте ги сите обврски кои не се неопходни
- Запомнете: постпородилната депресија не е ваша вина
