На Клиниката за гинекологија и акушерство (ГАК), 61-годишна жена од Скопје го роди своето прво дете, со што стана највозрасната прворотка во Македонија. Бебето Петар, родено во 36. недела од бременоста со царски рез, е тешко 2.350 грама и долго 48 сантиметри. И мајката и бебето се во стабилна состојба и денеска беа пуштени дома.
Да се стане мајка на 61 година е храбар подвиг што ги руши границите на биологијата и предрасудите на општеството. Тоа е доказ дека љубовта, надежта и вербата во сопствениот сон можат да го надминат секој предизвик
Пациентката е прва во земјата што успешно родила со сопствена криопрезервирана јајце-клетка. Целокупниот третман, вклучувајќи ја ин витро постапката, следењето на бременоста и породувањето, се извршени во Македонија.
„Дека во светот на медицината не постојат повеќе граници и дека медицината во Македонија може да се мери со онаа во светски граници говори и раѓањето на бебето Петар, коешто на свет го донесе највозрасната пациентка во нашата држава. Оваа пациентка е прва која е останата бремена со сопствена јајце-клетка, којашто била криопрезервирана, замрзната, којашто добила ин витро третман во нашата држава, цела бременост и била следена во нашата држава и раѓањето е завршено на Универзитетстата клиника за гинекологија и акушерство“, информира директорката на ГАК, д-р Ирена Алексиоска-Папестиев, на денешната средба со новинарите.
Пациентката е прва во земјата што успешно родила со сопствена криопрезервирана јајце-клетка. Целокупниот третман, вклучувајќи ја ин витро постапката, следењето на бременоста и породувањето, се извршени во Македонија
„Кај пациентката направивме царски рез во 36. ГН и истата роди плод, Петар којшто беше тежок 2.350 г и долг 48 см. Оперативниот тек помина уредно. Во текот на своето акушерско минато, оваа мајка – херој, имала богато акушерско и гинеколошко минато. Пациентката имала три претходни интервенции, две се направени во Белград и една во нашата институција, и понатаму во тек на бременоста, којашто била контролирана, имала висок притисок и шеќерна болест. Им честитаме на родителите кои не се откажале од својот сон, не потклекнале на неуспесите, на притисоците од околината и на предрасудите со кои живееме“, додаде д-р Алексиоска-Папестиев.
Секоја мајка носи живот, но да се стане мајка на 61 година носи нешто повеќе – порака за надеж и потсетник дека и најневозможните желби можат да станат реалност. Доаѓањето на свет на Петар, после 37 години брак, 10 неуспешни ин витро обиди, 10 спонтани абортуси и три претходни гинеколошки операции е потсетник дека животот може да биде полн со изненадувања, но и благослови, па дури и кога мислиме дека е се изгубено, да се оствари сонот што е еднакво на чудо!
