Ширум светот досега се администрирани над 3,7 милијарди дози вакцина против Ковид-19, а многумина летово се решија да ги спакуват куферите и да отпатуваат во странство. Но, треба да знаете дека не сите вакцини се подеднакво вредни при преминување на границата.
На страницата VisaGuide можете да проверите кои земји ја признаваат вакцината што сте ја примиле. Внесете ја вакцината, а потоа посакуваната дестинација и ќе ги добиете бараните информации
Во различни земји се прифаќаат различни вакцини
Многу влади дадоа зелено светло само на оние лица кои биле вакцинирани со одредени вакцини. Европската унија, на пример, навести овој месец дека нема да дозволи влез на оние кои примиле „Ковидшилд“, индиската верзија на „АстраЗенека“, бидејќи не е одобрена од европскиот регулатор на лекови. Индија се закани со одмазда и рече дека „може да воведе реципрочна одлука за признавање на дигиталниот сертификат на ЕУ“. Би-Би-Си наведува дека ситуацијата со „Ковидшилд“ се однесува на политиката на Европската унија, а не на индивидуалните земји-членки и дека Австрија, Германија, Словенија, Грција, Ирска и Шпанија објавиле дека дозволуваат влез на посетителите кои биле вакцинирани со оваа вакцина.
Светската здравствена организација, покрај „АстраЗенека“, ги одбри и вакцините „Фајзер“, „Модерна“, „Џонсон и Џонсон“ и две кинески вакцини. Но, каква е глобалната состојба со прифаќање на различни вакцини за преминување на границите?
„АстраЗенека“ е најприфатената вакцина, по неа следува „Фајзер“
Според податоците на страницата visaguide.world, најприфатената вакцина ширум светот, во смисла на преминување на границата, е онаа на „АстраЗенека“, која е одобрена од 119 земји, вклучително и СЗО.
После „АстраЗенека“, доаѓа „Фајзер“, која е одобрена од скоро 90 земји, а потоа „Спутник V“ (се признава од повеќе од 60 земји). После тоа, доаѓаат „Модерна“ и „Џонсон и Џонсон“. Од друга страна, кинеската „CanSinoBio“ е признаена од само неколку држави. На страницата VisaGuide можете да проверите кои земји ја признаваат вакцината што сте ја примиле. Внесете ја вакцината, а потоа посакуваната дестинација и ќе ги добиете бараните информации.
Уште еден проблем
Проблемот не е само преминување на границата. Иако САД засега не бараат сертификат за вакцинација за влез во земјата (иако меѓу другите Америка е затворена за Британците, Европејците, Кинезите и Индијците), Канаѓаните вакцинирани со „АстраЗенека“ изразија загриженост за можните проблеми при влегувањето во објекти кои бараат потврда за примена вакцина, која е одобрена од страна на Агенцијата за храна и лекови на САД (ФДА). Имено, иако САД нарачаа 300 милиони дози од вакцината „АстраЗенека“, ФДА сè уште не ја одобрила, пишува „Економист“.
Туристичката индустрија е загрижена дека ваквите ограничувања можат да ги задржат луѓето дома. Маријангела Симао, помошник извршен директор на СЗО, рече дека Европскиот парламент им препорачал на земјите да размислат за прифаќање на вакцините кои се наоѓаат на списокот за итно одобрување на СЗО.
Меѓу вакцините за кои во моментов е малку веројатно дека ќе добијат меѓународно одобрување се руските „Спутник V“, индиската „Коваксин“ и кубанската вакцина „Абдала“, пишува хрватски „Индекс“.
