Многу деца во текот на растењето постојано слушале дека мораат да бидат благодарни. Меѓутоа, константното прсилување на децата да кажат „благодарам“ за се, може да има негативно влијание врз нив. Детскиот психолог Џим Шредер споделува неколку совети со кои на нежен начин можеме да поттикнеме благодарност кај децата.
1. Бидете пример
Пред сè, кога ги учиме нашите деца на благодарност, треба да ги земеме предвид нивната возраст и развој кои влијаат на нивното разбирање за благодарноста.
„Пред да ги научите вашите деца како и кога да бидат благодарни, треба да ги споделите вашите сопствени моменти на благодарност (и позитивните емоции што доаѓаат со нив) за да можат да ја видат благодарноста на дело“, објаснува Шредер.
Ако децата видат колку се благодарни нивните родители за сè, тие ќе го реплицираат тоа.
2. Разговарајте за позитивни искуства
Пред да почнеме да им кажуваме на нашите деца да бидат благодарни, важно е да им помогнеме да ги разберат сопствените чувства на благодарност. Психологот советува дека тоа може да се постигне ако ги прашате како се чувствуваат за сопствените позитивни искуства, како што е добивањето подарок или помошта од некого.
Родителите треба да ги научат децата да размислуваат за фактот дека другите директно учествувале во нивната радост, па ова е подарок што тие треба да го вратат на некој начин, дури и ако тоа е само обична прегратка или изразување „благодарам“.
3. Имајте разумни очекувања
Очекувањето чести изрази на благодарност може да има негативен ефект врз многу деца. Затоа, би било поефикасно да се најдат креативни, флексибилни начини за поттикнување на благодарноста.
„Наоѓањето креативни начини кои се усогласуваат со личностите или интересите на нашите деца (на пример, едно дете можеби сака да нацрта слика, додека друго може да се заблагодари свирејќи на пијано) може да ја всади оваа навика“, заклучува Шредер.
