Ова се неколку совети како да го спречите сериозното губење течности за време на летниот одмор.
Педијатрите советуваат децата да пијат течности, пред и по пливањето. Најдобриот пијалак е водата бидејќи таа најдобро ја гаси жедта и го задоволува телото со течности. Газираните пијалаци, засладените сокови може да направат спротивен ефект. Доколку детето не ја прифаќа водата, обидете се со вода со вкус на лимон, јагода или друго овошје.
Чекори со кои нема да дозволите да се случи пад на нивото на течности
Избегнувајте го најтоплиот период. Не изложувајте го детето на директното влијание на сонцето во периодот помеѓу 11-17 часот.
Бидете посебно внимателни на влажните денови. Внимавајте колку вашето дете внесува течности, особено во деновите во кои влажноста на воздухот е зголемена. Тогаш детето се поти повеќе, со што губи течности и електролити. Доколку влажноста е преголема, најдобар совет е да не престојува предолго време надвор.
Пауза под сенка. Сончевите зраци се корисни, но одвреме навреме тргнете го детето од сонцето и најдете му занимлива замена под сенка. Донесете ги неговите омилени играчки, направете кула од песок, најдете начин како детето ќе одмори.
Пауза за вода. Оваа рутина нека стане навика, така што детето ќе знае дека по некое време треба да се одмори и да се напие вода. Доколку не можете да го навикнете, вие сте тие кои треба да му обезбедите доволен внес на течности.
Знаци на лесна дехидратација
Доколку детето се жали на вртоглавица и гадење, доколку забележите намалено уринирање и сува уста, ова се знаци дека вашето дете губи течности и веднаш треба да ги надополните изгубените течности електролити. Подгответе му супа, сок од цедено овошје или едноставно чаша вода со малку сол/шеќер.
