Повеќето од нас не би размислувале премногу за настинка, стомачен вирус или херпес. Но, лекарите апелираат до родителите да бидат внимателни доколку овие состојби влијаат на нивните новородени бебиња. На пример, некои вирусни инфекции може да предизвикаат потенцијално сериозни компликации, како што е пневмонија, кај малите деца.
Херпес
Педијатарката Муриел Месо истакнува дека бебињата се ранливи поради недоволно развиениот имун систем, па херпесот може да има многу посериозни последици отколку кај постарите деца или возрасните.
„На бебињата можеби ќе им треба сериозна медицинска помош ако дојдат во контакт со вирусот херпес симплекс. Ако бебето развие осип налик на меурчиња, особено ако било во контакт со лице со херпес, побарајте лекарска помош. Превенцијата е дефинитивно подобра од лек и затоа, ако некој има херпес на усните, треба да избегнува контакт со бебето и да ги мие рацете“, предупредува таа.
Настинка
Дури и класичните симптоми на настинка, течење на носот, кашлица или треска може да бидат опасни за новороденчињата, тврди д-р Месо.
“Знаци на сериозна инфекција вклучуваат невообичаена поспаност, забрзано дишење и треска. Бебе под три месеци со овие симптоми бара итна медицинска помош”, додава педијатарката.
Воспаление на увото
Инфекциите на ушите се многу чести кај малите и постарите деца и обично поминуваат сами по себе во рок од три дена. Но, на бебињата помлади од три месеци со инфекција на увото кои имаат температура, ги тријат ушите, не реагираат на некои звуци или се немирни и раздразливи и одбиваат храна, дефинитивно им е потребен лекарски преглед.
Сипаници – варичела
Во повеќето случаи, овчите сипаници се лесна болест кај децата и не е причина за загриженост, но постои ризик од развој на сериозни компликации кај малите бебиња. Дехидрација, воспаление на мозокот и другите органи, вклучително и бубрезите или панкреасот, се можни компликации од сипаници кај новороденчињата.
„Секое бебе помладо од еден месец кое било изложено на сипаници и потоа се појавил осип треба да го прегледа лекар“, вели д-р Месо.
Повраќање и дијареа
Иако повраќањето е многу често кај малите бебиња, стомачната вироза може да има сериозни последици – најчесто дехидрација.
Габична инфекција
Соорот е честа габична инфекција која лесно се лекува, но може да биде болна и да влијае на доењето. Родителите можат да го препознаат по белите траги во устата или на јазикот, а потоа треба да се јават кај својот педијатар. Имајте предвид дека ова не е состојба која бара одење во Ургентен центар, освен ако детето е дехидрирано, што може да се препознае со одбивање храна, суви пелени и поспаност.
