Русија тестираше аеросолна форма на својата вакцина против КОВИД-19, која е погодна за деца на возраст од 8 до 12 години, а новиот производ, во форма на спреј за нос, планира да го лансира во септември, изјави научникот кој го водеше развојот на вакцината Спутник V.
- Александар Гинтсбург, раководител на институтот Гамалеја кој го разви Спутник V, рече дека „спрејот за деца ја користи истата вакцина само наместо игла има распрснувач“, објави агенцијата ТАСС.
Спрејот за деца се очекува да биде подготвен за дистрибуција до 15 септември, беше цитиран Гинтсбург за време на состанокот со претседателот Владимир Путин, пренесува Ројтерс.
Истражувачката група ја тестирала вакцината врз деца на возраст меѓу 8 и 12 години и не открила несакани ефекти меѓу тест групата, ниту зголемување на телесната температура, рече Гинтсбург.
„Ние ги вакцинираме нашите најмали (пациенти) назално, применувајќи ја истата вакцина како и за возрасните, само во спреј за нос“, рече Гинтсбург, без да даде други детали за студијата, како што е бројката на деца кои биле вклучени.
