Кога станува збор за новороденчињата, плачењето е единствениот начин на кој бебето може да комуницира со вас. Тоа не знае во што е проблемот, знае само дека му е неудобно или дека нешто го боли и плаче да ја искаже својата состојба.
Ќе поминат недели и месеци пред детето да научи да препознае дали го мачи глад, студ или фрустрација и да сфати дека вие можете да му помогнете и дека тоа ќе го направите. Како што бебето учи начини да комуницира со вас, ќе плаче се помалку и помалку. Начинот на кој реагирате на плачот на вашето бебе е дел од процесот на учење на вашето дете да ви верува и дека ќе одговорите на секоја негова потреба.
Зошто нè вознемирува бебешкиот плач?
Веќе неколку дена по раѓањето, ќе можете да ги препознаете нијансите на плач на вашето бебе и според начинот на кој плаче ќе препознаете дали се работи за примарни биолошки потреби или нешто вознемирувачко, како што е прекумерна стимулација од надворешни надразби или некаква непријатност и болка. Во телото на мајката, кога бебето ќе заплаче, се случуваат хемиски реакции кои ја поттикнуваат да дејствува. Плачот на вашето дете е моќен стимуланс кој го поттикнува излачувањето на хормоните на стрес во вашиот крвоток. Притисокот на мајката расте, дишењето се забрзува, мускулите стануваат напнати,а се појавува чувство на непријатност, што се засилува колку подолго и посилно плаче бебето.
