Споредувајќи 24.673 пациенти заболени од КОВИД-19 кои преживеале најмалку една недела по отпуштањето од болница со 123.362 лица на слична возраст во општата популација, научниците идентификувале двојно поголем ризик од потворен прием во болница или смртен исход во текот на следните 10 недели помеѓу лицата кои прележале КОВИД-19.
Во споредба со 16.058 пациенти кои биле хоспитализирани поради последици од инфекција со сезонски грип, веројатноста пациентите со КОВИД-19 да бидат повторно хоспитализирани или да умрат од првичната инфекција или некоја друга инфекција на долниот респираторен тракт била за 37 отсто поголема, објавија англиските научници во стручното списание PLOS Medicine.
Во научниот труд се наведува и дека ризикот од смртен исход кај пациенти со деменција кои заболеле од КОВИД-19 и затоа биле хоспитализирани, бил исклучително висок во месеците по отпуштањето од болница.
“Хоспитализирани се голем број на лица заболени од КОВИД-19, а зголемениот ризик од смртен исход и повторен прием во болница може значително да влијае на јавното здравје и ресурсите“, наведуваат научниците.
“Ризикот може да се минимизира или ублажи со зајакнување на следењето на здравствената состојба на пациентите во месеците по отпуштањето од болница, како и со зголемување на свесноста кај пациентите и лекарите за потенцијалните проблеми“, се заклучува во написот.
