И покрај 25 – 60 проценти побрзото ширење на јужноафриканскиот сој, олеснува фактот што досега овој сој не се покажа како посмртоносен, а и вакцината е сè уште доста ефикасна, а тоа е најважно, смета научникот Иван Џикиќ од универзитетот Гете во Франкфурт.
Џикиќ изрази загриженост за јужноафриканскиот сој за кој смета дека е најопасен, пренесува „24 часа“.
„Може да дојде до зголемена смртност, но не во смисла дека има поголеми шанси лицето заразено со јужноафриканскиот сој да има потешка форма на болеста и да умре, туку затоа што, поради брзото ширење кај населението, повторно ќе дојде до преоптоварување на здравствениот систем. Симптомите се исти како и кај инфекцијата со изворниот облик на вирусот, но тие се појавуваат побрзо и побрзо се шират внатре во самиот организам. А кога сојот ќе се прошири кај населението, болниците наместо пет, во исто време ќе примаат 10 пациенти со брз развој на симптомите“, вели Џикиќ, кој ја споменува Велика Британија на која и се случи токму ова сценарио.
Џикиќ посочува дека вакцините, иако се помалку ефикасни против овој сој, сепак, се ефикасни во поглед на спречување на развивање на потешки форми на болеста. „И тоа е она што е најважно“, порачува тој.
Островот Занзибар – едно од жариштата на јужноафриканскиот сој
Се чини дека едно од жариштата на јужноафриканскиот сој е токму островот Занзибар, каде што, како и во цела Танзанија, не се применуваат ограничувања за контрола на Ковид-19.
И покрај 25 проценти до 60 проценти побрзото ширење на јужноафриканскиот сој, олеснителен факт е што досега овој сој не се покажа како посмртоносен
Според хрватските медиуми кои пренесуваат сведоштва на патниците од Хрватска кои неодамна биле во Танзанија, луѓето таму не се замараат премногу со коронавирусот.
„Никаде не се носат маски. Таму бевме сите измешани, белци, црнци, косооки, локални жители… Гужви од утро до вечер. Во Стоун Таун, посетувајќи музеи, плажи, пазари, ресторани и барови, не сретнав никој со маска“, раскажа Сања Мехиновиќ од Загреб за „Слободна Далмација“.
Истото го потврдува и Петка Конер, поранешна водителка на ХРТ, која често ги пречекува туристите од Балканот и е нивни домаќин на Занзибар.
„Занзибар е целосно отворен во моментот, без никакви ограничувања поради Ковид. Преполн е! Толку многу што се бара кревет повеќе. Претседателот на Танзанија никогаш не го негираше постоењето на вирусот, но од првиот ден на појавата на Ковид-19, животот се одвива нормално. Нема ограничувања на слободата на движење, дишењето, живеењето…“, вели Конер.
