Стравот од породување е природен, особено ако сте прворотка. Толку многу работи ви се непознати, раѓањето само по себе носи одреден ризик, а лошите искуства на вшите пријателки или познанички може значајно да влијаат на вашата перцепција за породувањето. И жените кои претходно раѓале може да имаат страв, особено ако имале трауматско искуство на претходните породувања.
Од што се се плашат жените при помислата на породување и како можат да си помогнат?
Претходните лоши искуства го зголемуваат стравот
Перцепцијата за породување предизвикува страв кај прворотките. Без разлика дали станува збор за експлицитни сцени на породување во филмови или дали нивните пријатели детално им раскажувале за болката и грдите ситуации од родилната сала, начинот на кој жената го доживува породувањето има значително влијание врз нивото на страв.
Претходните лоши искуства или моменти на компликации во бременоста може да го зголемат и стравот од породување, а овој страв е посилен доколку претходната бременост завршила со спонтан абортус или со тешка здравствена состојба на детето.
Голем фактор во развојот на стравот е и претходното лошо искуство со медицинскиот персонал. Многу жени доживуваат акушерско насилство, кое остава долгорочни последици за самодовербата и психолошкото здравје на жената, како и на перцепцијата за идните раѓања.
Побарајте помош и не кријте го стравот
Првиот чекор кон решавање на проблемот е да си признаете себеси дека проблем постои. Отворено разговарајте со вашите најблиски за стравот и за тоа што ве загрижува, а ако видите дека разговорот со нив не помага, побарајте стручна помош. Разговорот со психотерапевт ќе ви помогне да ги идентификувате најчестите предизвикувачи за анксиозна реакција и заедно ќе се обидете да дојдете до техника за смирување во такви ситуации.
Ако стравот од породување ве опседнува, избегнувајте да зборувате за туѓите искуства, особено за негативните. Наместо тоа, најдете квалитетен курс за подготовка за породување и поминете го со вашиот партнер. Познавањето на сите фази на породувањето и разбирањето на ситуацијата во која ќе се најдете ќе ви помогне подобро да се подготвите за нив. Ваквите курсеви ќе ви дадат увид во моментите кои можеби нема да одат според планот, но можете и на некој начин да се подготвите за нив.
