Кога детето ќе дојде дома со задача по математика, а родителот ќе рече: „Никогаш не сум бил добар по математика“, тоа можеби звучи како безопасна забелешка. Но, ново истражување покажува дека ваквите ставови можат долгорочно да влијаат врз успехот на детето.
Студијата, спроведена од научници од Универзитетот Лаубро и повеќе италијански универзитети, следела речиси 130 деца во период од пет години. Родителската анксиозност кон математиката била проценета кога децата имале три години, а нивниот напредок бил следен до осмата година.
Истражувањето, предводено од Универзитетот во Болоња, покажало значајна поврзаност меѓу стравот на родителите и послабите нумерички вештини кај децата. Иако не е докажано дека стравот директно се „пренесува“, децата на родители со висока анксиозност имале послаби резултати и на осумгодишна возраст.
„Нашите резултати покажуваат дека родителската анксиозност навистина влијае врз математичките постигнувања на децата“, вели д-р Кинга Морсани, член на истражувачкиот тим.
Наодите се објавени во научното списание Journal of Experimental Child Psychology. Експертите нагласуваат дека раните математички вештини се важен показател за идниот академски и професионален успех.
Советот до родителите е едноставен: избегнувајте негативни коментари за математиката. Покажувањето интерес, поддршка и позитивен став може да направи голема разлика. Никогаш не е доцна ниту родителите самите да ја зајакнат својата самодоверба преку курсеви или онлајн ресурси и да прифатат пристап во кој грешките се дел од учењето, а не доказ за неуспех.
