Емоционалниот стрес во најраната возраст може значително да го зголеми ризикот за развој на псоријаза подоцна во животот. Ново истражување покажува дека трауматичните настани во детството го нарушуваат функционирањето на имунолошкиот систем, кој подоцна може погрешно да ги нападне здравите кожни клетки и да предизвика автоимуни заболувања.
Истовремено, заштитните фактори како што се доењето и емоционалната сигурност имаат спротивен ефект – го зајакнуваат одбранбениот систем и го намалуваат ризикот од појава на псоријаза.
Стручњаците нагласуваат дека раната поддршка и стабилната семејна средина не се важни само за психолошкиот развој на детето, туку и за неговото долгорочно физичко здравје.
Како стресот во детството го менува имунитетот
Студија објавена во PubMed, покажува јасна поврзаност: децата изложени на семејни конфликти, особено на развод на родителите, почесто заболуваат од псоријаза во зрелоста.
Причината е што стресот ги активира хормоните кои го доведуваат телото во состојба на „борба или бегство“. Кога таквата состојба трае подолго време – како при хроничен семеен стрес – доаѓа до зголемување на нивото на кортизол, пораст на воспалителните процеси, ослабување на кожната бариера и нарушување на имуниот систем.
Таквите промени можат трајно да влијаат на тоа како телото реагира на стрес и инфекции, отворајќи пат за развој на автоимуни болести.
Што можат да направат родителите?
Иако псоријазата не може целосно да се спречи, намалувањето на стресот во детството може да биде клучен заштитен фактор. Родителите и старателите можат да помогнат со:
- создавање безбедно и стабилно семејно опкружување
- навремени разговори за емоциите
- избегнување конфликти пред децата
- поддршка во стресни ситуации (училиште, преселба, семејни промени)
- поттикнување здрава исхрана и навики за спиење
Грижата за менталното здравје на детето е исто толку важна како и грижата за неговото физичко здравје. Колку е детето поемоционално сигурно, толку е посилен и неговиот имун sистем.
