Зборовите што ги користат родителите можат да станат темели врз кои децата ја градат својата слика за себе и за светот. Иако сите понекогаш грешиме, пораките кои се повторуваат од детството оставаат подлабока трага отколку што мислиме. Не е исто како детето ја доживува реченицата изговорена со разбирање и кажаната со критика. Зборовите што доаѓаат од родителите се особено моќни – затоа што тие се првиот пример за децата, првите авторитети и првите емоции.
За жал, многу родители, несвесно или поради умор, користат изрази кои можат да направат децата да се чувствуваат како да не се доволно сакани, разбрани или прифатени. Експертите предупредуваат дека овие зборови, иако често се кажуваат без лоша намера, можат да ја нарушат самодовербата на детето и да влијаат на емоционалниот развој на долг рок. Некои од овие зборови може дури и да го влошат однесувањето што се обидуваме да го поправиме.
Според експертите, доколку родителите ги користеле овие зборови, тоа би можело да значи дека личноста не добивала љубов на начинот на кој и бил потребен.
Пребирлив/а: Иако пребирливоста во исхраната е честа во детството, студија од 2017 година покажала дека притисокот и етикетирањето може да ги влошат навиките во исхраната и да го зголеат отпорот кон храната.
Проблематично дете: Според студија од 2019 година, ваквата етикета може да ја наруши самодовербата на детето и да доведе до дополнителни проблеми во однесувањето и тешкотии во односите.
Драма крал/кралица: Овој израз често означува прекумерна емоционалност. Студија од 2024 година го поврзала со карактеристиките на хистрионското растројство на личноста и предупредила дека таквите етикети ги минимизираат вистинските емоционални потреби на детето.
Чувствителен/а: Овој израз често се користи за да се минимизираат или да се отфрлат детските емоции, со што се испраќа порака до децата дека нивните реакции не се прифатливи.
Разгалено дете: Овој збор најчесто се користи за да се опише однесување кое возрасните го доживуваат како несоодветно, но наместо да помогне, често води до отуѓување и срам.
Секако, сите грешиме и секое семејство има моменти на напнатост. Но, важно е да станеме свесни колку значат зборовите, особено оние што ги повторуваме. Наместо да ги дефинираме децата со негативни етикети, експертите препорачуваат користење повеќе позитивни термини кои поттикнуваат развој, разбирање и чувство на сигурност. На децата не им требаат совршени родители – им требаат оние кои учат и зборуваат внимателно.
