Истражувачите ја испитувале поврзаноста помеѓу индексот на телесна маса (БМИ) и темпото на одење со ризикот од смртност од Ковид-19
♦♦♦♦♦♦♦
Според тимот на истражувачи од Националниот институт за здравствени истражувања од „Leicester Biomedical Research Center“ во Велика Британија, луѓето кои одат бавно имаат четири пати поголема веројатност да умрат од последици од инфекција со коронавирус. Истражувањето го водел проф. Том Јејтс од Универзитетот во Лестер, кој се занимава со проучување на физичката активност и седечкиот начин на живот врз здравјето.
Бавните пешаци со нормална тежина се изложени на поголем ризик од смртност од Ковид-19 отколку брзите пешаци со прекумерна тежина
Била испитувана поврзаноста помеѓу индексот на телесна маса (БМИ) и темпото на одење со ризикот од смртност од Ковид-19. Анализата открила дека бавните пешаци со нормална тежина имаат скоро 2,5 пати поголема веројатност да развијат сериозен Ковид-19 и 3,75 пати поголема веројатност да умрат од вирусот отколку брзите пешаци со нормална тежина, пишува „Медикал Експрес“.
Биле користени податоци собрани од повеќе од 400 000 средовечни луѓе. „Веќе знаеме дека дебелината е клучен ризик фактор за исходот на Ковид-19. Ова е прва студија што покажува дека бавните пешаци имаат многу поголем ризик од тежок исход од Ковид-19, без оглед на нивната тежина. Бидејќи пандемијата продолжува да го преоптеретува здравствениот систем, идентификувањето на поединци со најголем ризик и преземање на превентивни мерки за нивна заштита е од клучно значење“, вели професорот Јејтс.
Брзите пешаци општо имаат добро кардиоваскуларно здравје, што ги прави поотпорни на надворешните стресови, вклучително и вирусна инфекција, но оваа хипотеза сè уште не е утврдена за заразни болести
Следното клучно откритие на оваа студија е дека бавните пешаци со нормална тежина се изложени на поголем ризик од смртност од Ковид-19 отколку дебелите брзи пешаци. Понатаму, ризикот бил подеднакво висок кај бавните пешаци со нормална тежина и дебелите бавни пешаци.
„Се покажа дека брзите пешаци општо имаат добро кардиоваскуларно здравје, што ги прави поотпорни на надворешните стресови, вклучително и вирусна инфекција, но оваа хипотеза сè уште не е утврдена за заразни болести“, вели професорот Јејтс. „Иако постојат податоци од базата на податоци за поврзаноста на дебелината со исходите од Ковид-19, рутинските клинички бази на податоци во моментов немаат податоци за поврзаноста помеѓу кондицијата и исходот од Ковид-19. Според мое мислење, тековните студии на јавното здравство и надзор треба да размислат за можност да бидат вклучени едноставни мерки на телесна подготвеност, како што е само-пријавување на темпото на одење, заедно со БМИ, како потенцијални предиктори на ризиците од исходот од Ковид-19, кои на крајот можат да овозможат подобри методи на превенција и да спасат животи“.
Истражувањето е објавено во „International Journal of Obesity“.
