Веќе знаеме дека викањето на децата не е особено ефективно, а „тепањето“, односно физичкото казнување се уште помалку ефективни. Знаеме и дека таквите последици од детските постапки на никој начин не се корисни за децата. Но, ново истражување докажало дека таквиот постојан метод на воспитување, кој се заснова на строгост, може да има многу негативно влијание врз менталното здравје на детето.
Во текот на студијата, научниците следеле 7.500 деца на возраст од 3 до 9 години, а во текот на повеќегодишното следење откриле дека околу 10% од децата припаѓаат на групата на „висок ризик“ во однос на менталното здравје. Нивните симптоми на влошување на менталното здравје – почнувајќи од постојана тага до изливи на гнев – се влошувале со текот на годините.
Но, кога ги набљудувале децата чии родители често користеле строги мерки за воспитување, остра дисциплина, вклучувајќи викање или физичко казнување, тие имале 50 проценти поголема веројатност да завршат во таа група отколку нивните врсници.
Експертите велат дека резултатите, објавени во списанието Epidemiology and Psychiatric Sciences, нагласуваат една многу важна работа: некои родители треба да научат подобри стратегии за родителство за да влијаат на однесувањето на малите деца. Ова може да биде испраќање на одмор или тајмаут, со цел да се спречат изливите на гнев, но и поставување јасни и доследни правила на однесување што малите деца можат да ги разберат.
