Според студијата објавена во списанието „Clinical Infectious Diseases“, најдобро време за тестирање за Ковид-19 со домашен тест е четвртиот ден од почетокот на симптомите.
Истражувачите набљудувале скоро 350 луѓе и откриле дека количината на вирусот го достигнала врвот неколку дена откако се појавиле симптомите.
„Вирусното оптоварување се однесува само на количината на вирус што се реплицира во вашето тело, така што колку повеќе вирус се реплицира, толку е поголема шансата за позитивен тест“, рече Џон Браунштајн, главен директор за иновации во детската болница во Бостон.
Тој објасни дека како што инфекцијата напредува, така се зголемува и количината на вирус што се реплицира во телото, пренесува „ABC News“. Студијата покажала дека домашните тестови биле најпрецизни четвртиот ден по појавата на симптомите.
Иако некои ја детектирале инфекцијата во првите три дена, поголема е веројатноста дека тие ќе бидат негативни во тој период. Затоа, авторите на студијата наведуваат дека нивните наоди укажуваат на тоа дека луѓето не треба да го исклучат Ковид доколку имале негативен тест рано по почетокот на симптомите.
Центрите за контрола и превенција на болести (ЦДЦ) препорачуваат веднаш да се тестирате ако имате симптоми и, ако е негативен резултатот, да направите уште еден тест најмалку 48 часа подоцна.
