Студија, спроведена во Кина и објавена во списанието „Lancet Diabetes & Endocrinology“, е најновата која покажува поврзаност помеѓу дијабетесот за време на бременоста и зголемениот ризик, не само од аутизам, туку и од други проблеми со мозокот и нервниот систем.
Сè уште не е сосема јасно дали дијабетесот директно ги предизвикува овие проблеми. Но, кога мајките имаат дијабетес за време на бременоста, децата имаат 28 % поголема веројатност да бидат дијагностицирани со невроразвојно нарушување, во споредба со децата чии мајки немаат дијабетес за време на бременоста, според анализата на податоците од 202 претходни студии што опфатиле повеќе од 56 милиони мајки и деца.
Ризикот кај децата чии мајки имале гестациски дијабетес бил:
- 25 % поголем ризик за аутизам.
- 30 % поголем ризик за дефицит на вниманието и хиперактивност (АДХД).
- 32 % поголем ризик за интелектуални тешкотии.
Дополнително:
- 20 % зголемен ризик за проблеми со комуникацијата.
- 17 % за проблеми со движењето.
- 16 % за тешкотии во учењето.
Исто така, истражувачите забележале дека дијагностицирањето на дијабетес пред бременоста се поврзува со 39 % поголем ризик за едно или повеќе од овие невроразвојни нарушувања во споредба со гестацискиот дијабетес, кој често се решава со раѓањето. Дијабетесот се јавува во до 9 % од бременостите во САД, а зачестеноста расте, според Центрите за контрола и превенција на болести на САД.
Нова студија укажува на поврзаност помеѓу дијабетесот за време на бременоста и зголемениот ризик од невроразвојни нарушувања кај децата, како што се аутизам и АДХД. Иако истражувачите нагласуваат дека се потребни дополнителни истражувања, тие ја истакнуваат важностa од внимателно и редовно следење на нивото на шеќер во крвта во текот на целата бременост
Седум претходни студии споредувале деца со невроразвојни нарушувања со нивните браќа и сестри. Тие анализи не откриле ефект од дијабетесот кај мајката што укажува дека генетски или семејни фактори можат да придонесат кон зголемен ризик, забележуваат авторите.
Наодите ја нагласуваат важноста од медицинска поддршка за жените со ризик од развој на дијабетес, како и континуирано следење на здравјето и развојот на нивните деца, велат истражувачите.
„Врската помеѓу мајчинскиот дијабетес и аутизмот кај децата е добро позната“, изјави д-р Магдалена Јанецка од Медицинскиот факултет „NYU Grossman“, која ги проучува врските меѓу изложеноста во утробата и развојот на детето, но не била вклучена во новата студија.
Таа додава дека ваквите метаанализи овозможуваат подетално споредување на подгрупи, како што се мајки со веќе постоечки дијабетес или гестациски дијабетес, или деца со аутизам во споредба со оние со АДХД или нарушувања во движењето, но не може да докаже причинско-последична врска.
„Метаанализите ни овозможуваат да ги споредиме групите со поголема прецизност. Истовремено, тие не нè приближуваат до разбирање на причините или механизмите во основата“, вели Јанецка, пренесува „Хина“.
