Австралиска студија открива изненадувачка врска помеѓу навиките за спиење кај доенчињата и развојот на аутистичен спектар на нарушувања во подоцнежната возраст. Според резултатите, бебињата кои спијат пократко или имаат проблеми со квалитетот на спиењето уште од раната возраст, имаат поголеми шанси за развој на особини поврзани со аутизмот. Не само што овие деца можат да покажат аутистични карактеристики, некои подоцна можат да добијат и официјална дијагноза на аутизам.
Истражувањето укажува на важноста на добрите навики за спиење во првите години од животот, бидејќи недостигот од сон може да биде рано предупредување за развој на аутистични особини. Аутизмот е невроразвојна состојба која влијае врз социјалната комуникација и вклучува ограничени и повторувачки модели на однесување.
Повеќе сон, помал ризик
Студијата, објавена во списанието „Archives of Disease in Childhood“, следела над 1 000 мајки и нивните деца од шестмесечна возраст до 12 години. Резултатите покажале дека секој дополнителен час ноќен сон на возраст од шест месеци го намалува ризикот од појава на аутистични особини за 4,5 % и веројатноста за дијагноза на аутизам до 12-та година за 22 %.
Иако аутизмот може да се дијагностицира уште од 24-месечна возраст, кај многу деца дијагнозата се поставува дури околу третата или четвртата година, со што често се пропушта најповолниот период за навремена интервенција
Кај бебињата кои на 12-месечна возраст побавно заспивале бил забележан поголем ризик: секои дополнителни 5 минути потребни за заспивање го зголемувале ризикот за дијагноза на аутизам за 7,7 %.
Научниците сметаат дека обрасците на спиење би можеле да послужат како рани индикатори за аутизам, што би овозможило порано препознавање и интервенција, вклучувајќи и поддршка за решавање на проблемите со спиењето, пренесува „Њузвик“.
Раната интервенција е клучна
Иако аутизмот може да се дијагностицира уште од 24-месечна возраст, кај многу деца дијагнозата се поставува дури околу третата или четвртата година, со што често се пропушта најповолниот период за навремена интервенција.
Поради тоа, експертите сè почесто препорачуваат долгорочно следење на повеќе фактори во развојот на детето, вклучувајќи и родителски набљудувања за времетраењето на спиењето и времето потребно за заспивање.
