COVID-19 може да го зафати панкреасот во тешки случаи, така што вирусот ги инфицира бета-клетките што произведуваат инсулин, покажала германска студија.
Панкреасот има две задачи – да произведува ензими важни за варењето на храната и да произведува и ослободува хормони инсулин и глукагон, кои го регулираат нивото на шеќер во крвта.
Научниците од Универзитетската болница во германскиот град Улм велат дека нивното откритие би можело да ги објасни симптомите слични на дијабетес откриени кај некои пациенти кои се сериозно погодени од болеста предизвикана од новиот коронавирус.
Исто така, би можело да го објасни и влошувањето на метаболизмот на шеќерот кај луѓето со дијабетес кои се заразени со вирусот.
Научниците од Универзитетската болница во германскиот град Улм велат дека нивното откритие би можело да ги објасни симптомите слични на дијабетес откриени кај некои пациенти кои се сериозно погодени од болеста предизвикана од новиот коронавирус
Новите податоци „го идентификуваат човечкиот панкреас како мета на инфекција со вирусот SARS-CoV-2 и сугерираат дека инфекцијата на бета клетките би можела да придонесе за метаболичко нарушување забележано кај пациентите со COVID-19“, наведуваат авторите на студијата.
Резултатите од студијата беа објавени во средата во списанието „Nature Metabolism“.
Научниците од Универзитетот во Кил претходно во еден журнал објавија случај на 19-годишно момче, кој почнало да страда од дијабетес откако било заразено со вирусот.
Еден од авторите на студијата во Улм, Мартин Вагнер, истакна дека имало повеќе случаи на нарушено ниво на шеќер во крвта кај пациенти со COVID-19.
Научниците го изложиле ткивото на панкреасот на вирусот за да утврдат дали може да биде заразено. Биле анализирани и телата на оние кои починале од болеста и утврдено е дека протеините на вирусот биле во панкреасот дури и кога повеќе ги немало во белите дробови.
Истражувањето покажало дека новиот коронавирус ги инфицира клетките на панкреасот, го менува нивниот облик, се меша со нивните гени и нивната функција.
Тоа покажува дека инфекциите со вирусот се почести и траат подолго отколку што се сметаше порано, вели Вагнер, а пренесува „Хина“.
